Marihana isaky ny 22 Avrily ny andro iraisam-pirenena ho an'ny tany. Andro natokana ho fanentanana ho fampiharana ireo fepetra isan-karazany hisitrahana ny zo momba ny fananan-tany sy ny fanakanana ny fihetsika rehetra amin'ny fahapotehan'ny ala sy ny fanaovana ny doro tanety. Isan'ny misehatra amin'izay fanajàna ny zo momba ny fisitrahana tany izay ny ONG Fiantso Madagasikara... 

Ho an'ny ONG Fiantso Madagasikara ny tsy fisitrahana fananan-tany no olana goavana eny amin'ny tontolo ambanivohitra. Ny 80% ny tantsaha mantsy no tsy misitraka tany misoratra amin'ny anarany eto Madagasikara hoy Andriamatoa Harimanga Abel. Na dia misy aza ny fanambarana momba ny zon'ny tantsaha nolaniana nandritra ny fivoriamben'ny firenena mikambana ny 17 desambra 2018 momba ny fisitrahan'ny tantsaha ny tany, dia azo lazaina fa mbola sarotra ho an'ny tantsaha ny misitraka izany.

Namelabelan-kevitra momba ny anjara toeran'ny fanabeazana eo amin'ny fiovan'ny toetr'andro sy ny tontolo iainana koa ny teo anivon'ny Sehatra Iombonana ho an'ny Fananan-tany na ny "SIF" ho fanamarihana izay andro iraisam-pirenena ho an'ny tany izay. Lohahevitra novoizina : "ny anjara toeran'ny fanabeazana eo amin'ny fiovan'ny toetr'andro sy ny tontolo iainana". Tokony apetraka eto amintsika ny drafitra fanajariana ny tany, mba ahazava amin'ny rehetra ny lalana izorana amin'ny fampiasàna an'i Madagasikara ho an'ny tombotsoan'ny Malagasy. Hevitra aroson'ny Sehatra Imbonana ho an'ny Fananan-tany "SIF" hiatrehana ny ho avy manoloana ny zava-misy ankehitriny.