Vahinin'i Papa François tao VAtican, omaly alatsinainy, ny praiminisitra slovaque Peter Pellegrini. Isan'ny nivoitra tamin'io fihaonana io ny fanasan'andriamatoa Pellegrini an'i Papa hivahiny any Slovaquie.
Fanirian'ny vahoaka Slovaque, hoy ity praiminisitra ity, ny mba hamangian'i Papa azy ireo. Voafaritra ho fahefatr'adiny ihany moa io fihaonana teo amin'ny roa tonta io teny am-piandohana saingy niitatra ho 40 minitra izany avy eo. Isan'ny voaresaka nandritra izany ny momba ny toe-draharaha any Eraopa ankehitriny, indrindra ny ao UKraine izay anton'ilay fihaonana an-tampony eo amin'ny filoha rosiana sy iokreniana, miaraka amin'ny filoha frantsay sy ny chancelière allemande, notanterahina tany Paris renivohitra frantstay, omaly alatsinainy. Fihaonana izay nangatahan'i Papa François vavaka nandritra ny Angélus tamin'ny alahady 8 desambra teo. Voaresaka tamin'io fihaonana teo amin'i Papa sy ny praiminisittra slovaque io koa ny sehatry ny fanabeazana, ny fahalalahana ara-pivavahana sy ny fifindramonina. Nofaranana tamin'ny fifanolorana fanomezana ho fahatsiarovana io fihaonana teo amin'ny roa tonta io. Taorian'izay moa dia mbola nihaona tamin'i Kardinaly Pietro Parolin, sekreteram-panjakana ao VAtican sy Monseigneur Paul Gallagher, sekreteram-panjakana misahana ny fifandraisana amin'ny firenen-kafa andriamatoa Peter Pellegrini.
