Nofaranana androany 08 septambra 2022 ny tetik'asa fikarohana momba ny voly vary FYVARY. Tetik'asa ambany fiahian'ny Ministeran'ny Fambolena sy ny Fiompiana nanomboka ny taona 2017, izay famatsiam-bolan'ny governemanta malagasy miaraka amin'ny governemanta japoney ny FYVARY...

Maro ny voka-pikarohana nivoaka tao amin'izany tetik'asa izany, isan'izany ohatra ny karazam-bary vaovao FYVARY 85 sy ny FYVARY 32, natao ho an'ny tany manta ary afaka misedra ny fiovaovan'ny toetr'andro. Toa izany koa ny teknika fandomana ny fakam-bary amin'ny ranon-jezika misy Phosphore mialohan'ny hanetsana azy na ny P-Dipping. Voka-pikarohana namaha ny olana amin'ny voly vary an'ivon-tany, azo tamin'ny alalan'ny ezaka nataon'ny malagasy mpikaroka ao amin'ny FOFIFA sy ny japoney teknisiana.

Olana mipetraka amin'ny nofon-tany ety afovoan-tany ny maha asidra be azy sy ny fisian'ny  oksidanà vy sy ny oksidanà aliminiaoma ao aminy izay singa mihazona ny Phosphore tsy ho trohan'ny vary maniry ka tsy ahafahany mahazo ny Phosphore sahaza azy. Ny Phosphore izay isan'ny singa tena ilain'ny vary ahafahany mitombo tsara sy mamokatra ihany koa.

Fomba iray handonahana ny tanimbary ho an'ny ety anivon-tany ny teknika P-Dipping. Mifototra amin'ny fandomana ny fakam-bary amin'ny ranon-jezika misy Phosphore mialohan'ny hanetsna azy na ny P-Dipping. Mampitombo haingana ny vary nambolena ny fampiasana ny teknika. Mampihena atsasany ny zezika ampiasaina sy ny vola lany ihany koa. Mihafohy ny tsingerim-panirin'ny vary ary mahatohitra hain-tany ny voly ampiasàna ny p-Dopping.