Alahady 29 nôvambra 2020 — Alahady voalohany amin'ny Fiaviana — Evanjely Masina nosoratan'i Masindahy Marka 13, 33-37 — Asehoy anay, ry Tompo, ny famindram-ponao ! ary omeo anay ny famonjena avy aminao.

0 : 00

Ry kristianina havana, Alahady voalohany amin'ny Fiavian'ny Tompo isika anio. Arahabaina isika mianakavy tratran'izao taona vaovaon'ny Fiangonana izao. Ho soa, ho tsara anie ny taona manontolo. Entanin'ny Fiangonana isika hiantso ny Tompo : "Tongava, ry Tompo tsara fo". Antso sy talaho am-pitokiana miandrandra famonjena izany. Torintsika amin'ny fiekem-pinoana rahateo ny hoe ho avy amim-boninahitra i Kristy, hitsara ny velona sy ny maty : famonjena izany ho an'izay mino.

Lehibe indrindra amin'ireo toe-panahy iandrasana ny Tompo ny fahavononana. Fiambenana no teny averimberin'ny Evanjely. Tsy hoe, sao misy mangalatra tonga fotsiny ihany no antony iambenana, fa vantany vao tonga eo am-baravarana ny Tompo, mandondona, na amin'ny firy na amin'ny firy, dia vonona ny hamoha azy, izay no antony iambenana.

Fa mbola tsy eo tokoa ve ny Tompo, amin'izao fotoana ? Lasa lavitra ? Zanaka tiana isika, zanaka itokisana ka tsy mila araha-maso na tenenina lava, fa atrehi-mahefa, iamboho-mahavita. Lehibe indrindra sady mila fahamalinana koa ny mitazona ny fitokisana napetraka. Raha sanatria ka efa namadika izany fitokisana izany : fotoanan'ny Fiaviana, fotoana fibebehana, iverenana amin'izay fitokisan'Andriamanitra izay.

Nasongadin'ny Evanjely manokana ny asan'ny mpiandry varavarana, satria io no mahita izay rehetra mivoaka sy miditra ao. Toa mitodika amin'i Piera izany, izy ilay voalohany amin'ireo Apôstôly namany, fa mitodika ihany koa amin'ireo manana andraikitra manokana ato amin'ny Fiangonana : aoka ho voalohany amin'ny fanatanterahana ny sitra-pon'ny Tompo.

Hahatoky hatramin'ny farany anie isika, ho vonona handray ny Tompo ka ho mendrika hiara-paly aminy, any an-tranony mandrakizay.

Ny rariny ho fampivoarana ny marefo

Arahanao amin'ny rakitsary eto ny firarian-tsoa avy amin'i Mgr Désiré Tsarahazana. "Raha tiantsika ny ho sambatra, dia tsy maintsy mampanjaka ny marina isika", hoy i Mgr Désiré Tsarahazana tamin’ny firarian-tsoa nataony ho an'ny Malagasy amin’izao Noely izao. Tia antsika rehetra tsy an-kanavaka Andriamanitra, noho izany dia tokony hifanaja sy hanampy ary hiaro ireo marefo indrindra.

Tohiny...

Sady mpanabe no mpitory Vaovao Mahafaly

Ry havana, migadona ity ny taona vaovao 2021. Koa amin’ny anaran’ny Fikambanana Salezianin’i Don Bosco eto Madagasikara sy ny Nosy Maorisy izay eo ambany fitantanako, no iarahabako antsika mianakavy Tratry ny Taona. Mirary ny soa sy ny tsara ary ny fahombiazana ho an’ny isambatan’olona sy isan-tokantrano.

Tohiny...

Entanin'ny fanantenana isika

Nivoaka tamin'ny 29 desambra 2020 ny fanazavana ofisaly ny teny fanentanan'i P. Ángel Fernández Artime, Recteur Majeur, ho an'ny taona 2021, mitondra ny lohateny ho : "Entanin'ny fananteanana isika : indro havaoziko ny zavatra rehetra" (Ap 21,5). Efa  nadika amin'ny fiteny dimy samihafa izy io: italianina, anglisy, espanola, portogey ary frantsay.

Tohiny...