Alahady 3 janoary 2021 — Ny nisehoan'ny Tompo na Epifania — Efa nahita ny kintany tany Atsinanana izahay, ka nankaty mba hitsaoka ny Tompo — Evanjely Masina nosoratan'i Masindahy Matio 2, 1-12

 

0 : 00

Mankalaza ny Epifania ny Eglizy amin’izao Alahady izao, na ny fisehoan’i Jesoa Zazakely tamin’ireo Majy izay tonga hitsaoka Azy.

Rehefa nambaran’ireo Majy tamin’i Herôda mpanjaka fa misy mpanjaka vao teraka ao Betilehema dia natahotra izy satria ho very ny fahefany ary nandray izany ho mpifaninana aminy, izany hoe fahavalo. I Jesoa anefa tonga teto an-tany tsy tahaka ny mpanjaka mihitsy, satria Izy àry, tsy mba teraka tao anaty Rova sy tao anatin’ny harena. Fa tonga Izy tao anatin’ny fahantrana ary fahefan’Andriamanitra no entiny fa tsy an’olombelona.

Ireto Majy ireto izay avy amin’ny tany tsy mpino dia nahalala tamin’ny fahaizany fa mpanjaka i Jesoa. Tsy nahasakana azy ireo tsy hitsaoka Azy sy tsy hanome fanatitra ho Azy ny fahantrana izay hitan’izy ireo tamin’ilay zaza vao teraka. Tanteraka tokoa eto ny voalazan’i Izaia mpaminany fa hanatitra volamena sy emboka ny Tompo ny tatsinanana ary mbola hitsaoka Azy. Nahafaly azy ireo tokoa ny nahita an’ilay Zazakely, mpanjakan’ny hafaliana sy ny fiadanana.

Ny Evanjely anio àry dia manasa antsika mba hiaiky fa i Jesoa no Mesia, tahaka ireto Majy izay avy any amin’ny tany tsy mpino ireto. Toetra tsara azo alain-tahaka amin’izy ireo ny fikelezana aina amin’ny fitadiavana an’i Jesoa. Tsy mba kivy ny nandeha sy ny nanontany izay nisy azy. Rehefa tsy mahita an’i Jesoa isika dia tsy mahita ny fiainana ihany koa satria Izy irery ihany no Mpamonjy. Ny mahita an’i Jesoa dia ny mahita ny lalana mitondra antsika any amin’ny fahamarinana izay manome ny fiainana.

Ny rariny ho fampivoarana ny marefo

Arahanao amin'ny rakitsary eto ny firarian-tsoa avy amin'i Mgr Désiré Tsarahazana. "Raha tiantsika ny ho sambatra, dia tsy maintsy mampanjaka ny marina isika", hoy i Mgr Désiré Tsarahazana tamin’ny firarian-tsoa nataony ho an'ny Malagasy amin’izao Noely izao. Tia antsika rehetra tsy an-kanavaka Andriamanitra, noho izany dia tokony hifanaja sy hanampy ary hiaro ireo marefo indrindra.

Tohiny...

Sady mpanabe no mpitory Vaovao Mahafaly

Ry havana, migadona ity ny taona vaovao 2021. Koa amin’ny anaran’ny Fikambanana Salezianin’i Don Bosco eto Madagasikara sy ny Nosy Maorisy izay eo ambany fitantanako, no iarahabako antsika mianakavy Tratry ny Taona. Mirary ny soa sy ny tsara ary ny fahombiazana ho an’ny isambatan’olona sy isan-tokantrano.

Tohiny...

Entanin'ny fanantenana isika

Nivoaka tamin'ny 29 desambra 2020 ny fanazavana ofisaly ny teny fanentanan'i P. Ángel Fernández Artime, Recteur Majeur, ho an'ny taona 2021, mitondra ny lohateny ho : "Entanin'ny fananteanana isika : indro havaoziko ny zavatra rehetra" (Ap 21,5). Efa  nadika amin'ny fiteny dimy samihafa izy io: italianina, anglisy, espanola, portogey ary frantsay.

Tohiny...