Alakamisy 02 jolay 2020 — Herinandro faha-13 mandavan-taona — Evanjely Masina nosoratan'i Masindahy Matio 9, 1-8 — Fanilon'ny tongotro ny teninao, ry Tompo, ary fanazavana ny lalako.
Mitohy hatrany ny asa fanirahana nataonʼi Jesoa na ny zava-mahagaga izay nasehoany teo anatrehanʼny vahoaka mba ho voninahitrʼAndriamanitra. Eto dia nanasitrana lehilahy malemy iray teo am-pandriana Izy, noho ny finoanʼilay malemy sy ireo mpitondra Azy. Ny famonjena antsika olombelona mantsy dia miankina amin’ny finoantsika aloha. Ny finoana tokoa no mahavonjy. Raha fanasitranana àry no nataonʼi Jesoa, dia teny famelan-keloka no nanampiany anʼilay malemy nositraniny : "Matokia anaka, fa voavela ny helokao". Midika izany fa rehefa manasitrana i Jesoa dia tsy ny ara-batana ihany no sitraniny eto fa indrindra ihany koa ny ara-panahy. Ny famonjena ny fanahintsika no tena zava-dehibe Aminy.
Etsy ankilanʼizay anefa dia tsy nahafaly anʼireo mpanora-dalana ny teny nataonʼi Jesoa namela heloka. Aminʼizy ireo mantsy dia Andriamanitra irery ihany no afaka mamela heloka. Eny, na ireo vahoaka ary tamn’izany, nihevitra anʼi Jesoa ho mpanasitrana fotsiny ihany fa tsy hoe ZanakʼAndriamanitra. Manoloana izany àry dia nambaranʼi Jesoa mazava tsara fa ny zanakʼolona dia tsy iza fa ny tenany ihany, dia manam-pahefana ety an-tany hamela heloka. Izy no manasitrana ny fahalementsika ara-panahy. Izany fahefana izany dia nampitainʼi Jesoa tamin’ny Eglizy amin’ny alalanʼny sakramentanʼny fampihavanana. Io no sakramentanʼny fahafahana sy mampiombona antsika indray amin’Andriamanitra be fitiavana sy be indrafo.
Ankehitriny àry dia hitantsika fa betsaka ny olona no manenjika hoe aiza no antokom-pivavahana misy fahagagana sy fanasitranana mba hiderana anʼAndriamanitra. Adinonʼizy ireo tokoa mantsy fa ny fanasitranana ara-panahy no tena zava-dehibe, satria i Jesoa dia tsy mpanasitrana fotsiny fa indrindra mpamela heloka.
Ny finoantsika sy ny fahatokisantsika anʼAndriamanitra àry dia tsy tokony ankinintsika amin’ny famantarana ivelany toy ny fahagagana sy ny fanasitranana ara-batana fa amin’ny fitiavantsika Azy.
