Talata 19 jolay 2022 — Herinandro fahenina ambin'ny folo mandavantaona — Raha misy tia Ahy, dia hitandrina ny teniko izy, ka ho tian’ny Raiko, ary hankao aminy Izahay ka honina ao aminy — Evanjely Masina nosoratan'i Masindahy Matio 12, 46-50

Iza moa no reniko ary zovy no rahalahiko na iray tampo amiko ? Mazava ny valintenin’i Jesoa, izay miaraka aminy amin’ny fiainana andavanandro, miara-mitory ny tenin’ny fiainana aminy. Ireo fianakaviana nipoiran’i Jesoa, nahita sy naheno ny fampianarany. Tsy araka ny fijerin’olombelona ny fijerin’i Jesoa ka heverin’izy ireo fa very saina izy araka ny nambaran’i Masindahy Paoly ao am 1 Kor 1, 17-2, 16 : "Fahadalana ho an’ny olona ny fahendren’Andriamanitra".

Amin’ireo izay mihaino azy no ilazan’i Jesoa hoe reniny sy rahalahiny. I Maria dia reniny satria nanao "eny" hatrany tamin’izay nangatahan’Andriamanitra taminy. Izay toa azy, manaiky ho fitaovana ampiasain’Andriamanitra dia iray tampo amin’i Jesoa, iray aina aminy. Hasambarana lehibe ho an’ny olona ny mahazo fahefana ho tonga zanak’Andriamanitra, tonga reharehan’Andriamanitra satria zanany, miombona antoka aminy amin’ny fanitarana ny fanjakany.

Jesoa ô, ataovy miaina ao anatin’ny hafalianao sy ny fanatanterahana ny sitraponano aho ka ho sambatra tokoa, satria fianakavianao. Amen.