Zoma 21 ôktôbra 2022 — Herinandro Tsotra fahasivy amby roapolo Mandavantaona — Asehoy ny mpanomponao ny tavanao, ary ampianaro ahy ny fitsaranao — Evanjely Masina nosoratan'i Masindahy Lioka 12, 54-59

Ry mpihatsaravelatsihy, hainareo fantarina ny toetry ny lanitra sy ny tany, ka ahoana àry no tsy ahafantaranareo izao diavintsika izao ? Nahoana koa no tsy amantaran’ny tenanareo izay marina ? Miantso antsika i Jesoa hijery ny fiainantsika manontolo amin’ny fahamarinana tokoa. Hasaina isika hijoro marina ho mpianatr’i Kristy. Ka ny lalàny dia tsy mitovy lalàn’izao tontolo izao, izay ny matanjaka no manjaka, ny vola no miasa. Ny an’i Kristy dia lalàn’ny fitiavana ka ny marina ihany no tokony hanjaka eo amin’ny fiainana. Te hampitandrina antsika eto i Kritsy mba tsy hampiasa fahefana ka hanao tsindry hazo lena ny madinika isika fa mba hitsara ny hafa araka ny marina tokoa.

Raha ny zava-misy eo amin’ny fianantsika andravanandro tokoa no resahina dia sarotra amintsika no miteny azy satria tsy te hilaza ny tena marina tokoa isika. Mihatsaravelatsihy isika matetika satria matahotra ny hilaza ny tena marina amintsika samy isika. Ary fantatsika mihitsy àry ny marina fa minia tsy manaraka ny marina isika. Ka hoy indrindra i Masindahy Paoly ao amin’ny taratasy nosoratany ho an’ny Romanina 7, 18-25 : "Fantatsika izay tsara nefa tsy ataontsika. Fantatsika ny fahotana nefa ataontsika ihany izany. Iza no mahavonjy antsika amin’izao fahasahiranana izao ? Iza re no hanafaka ahy amin’ity vatam-pahafatesana ity ?", hoy i Masindahy Paoly nanontany. Ny finoana an’i Jesoa Kristy Tompontsika, Izay manome ny Fanahy Masina ! Ka ny Fanahy no hitaona antsika hamela heloka, hanam-paharetana, hijoro amin’ny marina sy ho mpampihavana. Sarotra tokoa ny miala amin'ny fahazarana raha tsy miaraka amin’ny fahatokisana ny fahosoavan’Andriamanitra sy ny fanampiany isika rehetra.