Sabotsy 22 ôktôbra 2022 — Herinandro Tsotra fahasivy amby roapolo Mandavantaona — Fa ny tenin’Andriamanitra kosa dia maharitra mandrakizay; ary izany no tenin’ny Evanjely izay notorìna taminareo — Evanjely Masina nosoratan'i Masindahy Lioka 13, 1-9

"Moa ataonareo fa ireny Galelianina maty ireny dia mpanota mihoatra noho ny Galelianina rehetra matoa nozoin-doza toy izany ireny, na ireo vahoaka marobe maty nianjeran’ny tilikambon’i Silôe no meloka mihoatra ny mponina rehetra tao Jerosalema ? Tsia, tsy izany velively, hoy i Jesoa, fa raha tsy mibebaka isika dia ho very".

Matetika isika mihevitra fa ireo olona niharan’ny heristra na vono olona, na koa niharan-doza dia tsy narovan’Andriamanitra fa mpanota kokoa noho isika. Tsy izany velively anefa. Andriamanitra dia fitiavana, famindram-po, mpamelona fa tsy mpamono. Ka eto amin’ity Evanjely henontsika teo ity ireto olona Jody tonga miresaka tamin’i Jesoa ireto dia niezaka ny handresy lahatra ny tenany sy ny vahoaka fa matoa ireo Galelianina sasany ireo nidiran-doza, matoa Andriamanitra tsy niaro azy ireo dia satria "nisy zavatra nahadiso azy ireo". Tsy niady hevitra tamin’izy ireo momba izany anefa i Jesoa fa nampitandrina azy ireo kosa mba hibebaka. Aiza mangataka andro amin’ny fibebahana isika, araraoty ny faharetana sy ny famindrampon’Andriamanitra. Mikiky antsika tsikelikely ny ratsy ka mila fongorina, esorina ny zava-dratsy tsy mampamokatra antsika eo amin’ny fiainana izay mampanalavitra antsika an’Andriamanitra ary tsy tokony hangatahana andro ny manesotra izany. Ny fibebahana sy ny fiovana toe-tsaina tokoa mantsy dia miompana amin’izany famongorana ny ratsy, ka hahatsapana mandrakariva ny fitiavana amam-pamindram-po arotsak’Andriamanitra ho antsika isan’andro vaky. Anio àry Andriamanitra dia mandondona ny varavaran’ny fontsika, te hanome vokatra vaovao eo amin’ny fiainantsika izy, moa ve isika vonona hamela ny fontsika hokolokoloin’Andriamanitra ?