Talata 15 septambra 2020 — Masina Maria vonton'alahelo — Evanjely Masina nosoratan'i Masindahy Joany 19, 25-27 — Sambatra ianao ry Maria Virjiny, ilay nandray ny fandresen'ny Martiry teo ambany Hazofijalian'ny Tompo tsy nisy fahafatesana.
Tsy misaraka amin'ny tantaram-pamonjena antsika olombelona ny fijalian'i Masina Maria, hatramin'ny nitondrany am-bohoka an'i Kristy ka hatreo am-pototry ny hazofijaliana namantsihana an'i Kristy. Efa nambaran'i Simeona taminy izany raha nitondra an'i Kristy atolotra tao an-tempoly izy, manao hoe : "Indro ity Zaza ity fa ho fandavoana sy ho fanarenana ny maro amin'i Israely, ary ho famantarana ifanoherana, ka ny fanahinao aza hotanterahin-tsabatra, mba hisehoan'ny hevitra ao am-pon'ny olona rehetra" (Lk. 2, 33-35). Niatrika sedram-piainana mafy tokoa raha i Masina Maria noho ny sitrapon'Andriamanitra sy noho ny fitiavany antsika. Tsy toy ny fijalian'ny reny rehetra fa hafa araka izao tononkalo ao amin'ny Sorona Masina andavanandro izao : "Ndre mijoro... Izay tena sitrako". Nijaly sy vonton'alahelo tokoa i Masina Maria nahita ny fahorian-janany, noleferiny anefa izany noho ny fitiavany antsika, koa akambano aminy ihany koa ny alahelontsika, mibanjina ny fijalian'i Kristy noho ny fahotantsika.
