Nanao ny fivoriambe ara-potoana toa ny fanaony isan-taona ny Tranoben'ny Tantsaha Mpamokatra ny 23 sy ny 24 aogositra 2023. Nisy ny hevi-dehibe nodinihana sy nankatoavina nandritra  izany. Tapaka nandritra ity fivoriambe ity fa hiroso amin'ny fangatahana ny fanvaozana ny satan'ny Tranoben'ny Tantsaha Mpamokatra Association Reconnue d'Utilité Public na ARUP izy ireo. Ny ahafahan'ny Tranoben'ny Tantsaha Mpamokatra manatanteraka ny iraka nankinina taminy no mahazava-dehibe izay hoy ireo mpivory. Angatahana ihany ny hanamafisana ny fahaleovan-tena ara-bolan'ny rafitra...

Hotanterahana amin'ity taona 2023 ity koa ankoatr'izay ny fifidianana ireo olom-boafidy isan'ambaratongany ao amin'ny Tranoben'ny Tantsaha Mpamokatra. Maniry ny fiaraha-miasa amin'ny mpisehatra izy ireo mba ahafahana manatanteraka izany, indrindra ny mpiara-miombon'antoka miasa eny ifotony sy eo amin'ny sehatra nasiônaly hanatanterahana an-tsakany sy an-davany izay fifidianana izay.

Nankatoavin'ny fivoriambe koa ny vinan'asa matihanina ho an'ny taona 2023 sy 2027 niainga tamin'ny filàna ifotony. Mametraka vina ny haharafitra matanjaka azy ny TTM afaka 5 taona ary tsy azo iodivirana ny fisoloan-tenan'ny Tranoben'ny Tantsaha Mpamokatra ny tantsaha mpamokatra sy ny fampandrosoana ny tontolon'ny famokarana tantanam-pianakaviana.

Tapaka nandritra ny fivoriambe ny 23-24 aogositra 2023 teo koa ny fanatanterahana ny Fihaonamben'ny Mpamokatra handravonana ireo filàna ifotony sy anolorana soson-kevitra na fehin-kevitra ho an'ireo rafitra mpanapa-kevitra isan'ambaratongany eto amin'ny tany sy ny Fanjakàna.