Mamaha olana amin'ny fahasahiranana ara-bolan'ny mponina eny ambanivohitra, ny fanaovan'izy ireo ombona tahiry ifampisamborana na ny GVEC. Nanana traikefa efa ho valo taona tamin'izany ny fikambanana “Fanantenana”, ao amin'ny Fokontany Antandrokomby, Kaominia Mahitsy, ao amin'ny Distrikan'Ambohidratrimo.

Fikambanana nijoro tamin'ny taona 2014, ary tantsaha mitovy fijery no nanangana azy. Nomen'izy ireo anarana “Avotra fahatelo” ity GVEC-n'izy ireo ity. Hanamaivanana ny fahasahiranan'ny mpikambana amin'ny fahitana vola entina mikarakara ny fotoam-pambolena lehibe sy ny ara-tsôsialy toa ny fidiran'ny mpianatra, no antony nananganana azy.

Nisafidy hanangana GVEC izahay, hoy Andriamatoa Raobijaona Alain Bruno, Filoha mpitarika ny fikambanana, satria manahirana anay ny mindram-bola any amin'ireny banky sy rafitra fifampiraharahana ara-bola madinika ireny. “Eo aloha ny tahan-janabola alaina, ambony loatra ho anay tantsaha, fa eo ihany koa ny antoka takiana aminay mialoha”.

Namaha ny fahasahiranan'ny mpikambana ny fananganana ny GVEV, hoy Ramatoa Razafindranampy Jeanne, mpikambana nijoro ho vavolombelona tamin'ny traikefa azon'ny fikambanana.