Mankalaza ny faha-20 taona nijoroany amin'ity taona ity ny UNION MATANJAKA, fikambanamben'ny tantsaha mpamboly sy mpiompy misandrahaka ao amin'ny Distrikan'Antsiranana faharoa. Tsenabe atao ao Antsiranana ny 18 hatramin'ny 20 jolay 2024 no anombohana izay fankalazana izay.
Tsenabe anehoana ny maha-izy azy ny fikambanana eny ifotony mba ahafahan'izy ireo mifandray amin'ny mpiara-miombon'antoka samihafa na ara-bola na ara-teknika ary ahafahan'ny tantsaha mivantana mifandray amin'izy ireo.
Isan'ny vato fototra amin'izao faha-20 taona izao koa ny fananganana ny trano hatao ho foiben-toeran'ny fikambanana UNION MATANJAKA, izay vinavinaina hatomboka ny volana novambra 2024. Nanatsara ny velon-tenan'ny tantsaha mivondrona ao aminy ny fijoroan'ny fikambanana. Hita taratra izany nandritra izay 20 taona izay ; anton'izany ny tohana nataon'ny mpiara-miombon'antoka samihafa.
