Mitohy ny fikarohana ataon'ny mpikaroka amin'ny fomba iadiana amin'ilay aretim-bary malazo ravina BLB sy mitsipika amin'ny ravina BRS, miparitaka amin'ny faritra maro eto amin'ny nosy. Tsy mbola hita ny fanafody fa mitady an'ireo karazam-bary mahatohitra ny aretina ny teknisianina mpikaroka amin'izao fotoana izao...
Misy ny karazam-bary 30 anaovana andrana, vary izay misy eto Madagasikara, ahafantarana ny vary mahatohitra ireo aretina ireo.
Tamin'ny taona 2019 no nahitana ny BLB teto Madagasikara ka tombanana ho bakteria tany Azia tao Inde no tonga teto amintsika. Tamin'ny taona 2012 no voamarina fa nisy teto amintsika ny BRS na dia efa nisy teto Madagasikara am-polo taonany maro aza io aretina io. Tsy misy fiatraikany amin'ny fahasalaman'ny olona ihany koa ny fihinanana vary tratry ny BLB sy ny BRS hoy ny mpikaroka ao amin'ny FOFIFA Antsirabe, Harinjaka RAVELOSON.
Maro ny karazan'aretina mahatonga ny aretim-bary saingy ireto karazany miisa 2 ireto dia bakteria no mahatonga azy. Tsy avy amin'ny bibikely koa no mahatonga ny aretina.
Miteraka fahaverezam-bary 15% hatramin'ny 70% ny aretim-bary malazo ravina sy mitsipika amin'ny ravina arakaraky ny karazam-bary sy ny toetr'andro hoy hatrany ny teknisianina.
