Notanterahana tetsy amin'ny CCI Ivato ny 23 - 24 janoary 2025 ny atrik'asa nasiônaly momba ny fanovàna ara-pambolena na ny "transformation agricole". Atrik'asa anamafisana ny firotsahan'ireo mpisehatra, nananganana drafitra niaraha-nanaiky iarahana miroso amin'ny fanovàna ny fambolena...
Nandray anjara tamin'ny atrik'asa ny teknisianina, ny mpisehatra amin'ny fampandrosoana ny eny ambanivohitra, ny tantsaha, ny olom-boafidy sy ireo tompon'andraikitra any amin'ny ministera samihafa.
Laharam-pahamehana ao amin'ny Pôlitika Ankapoben'ny Fanjakàna ny fanatsarana sy fampitomboana ny famokarana eo amin'ny fambolena mifanindran-dalana amin'ireo tanjona lovain-jafy (ODD), kitro ifaharan'izany ny fahavitan-tena ara-tsakafo, ny fampiatiana ara-toekarena ireo mpamokatra madinika ary ny fampiroboroboana ny agri-busness izay ifanomezan-tanana amin'ny sehatra tsy miankina.
Tanjona ny hikajiana ny tontolo iainana amin'ny fampiasàna fomba fambolena maharitra sy teknolojia vaovao. Ireo indrindra no antony nanaovan'ny Fanjakàna ity atrik'asa nasiônaly momba ny fanovàna ara-pambolena ity.
Namintina ireo hevitra avy amin'ny asam-baomiera samihafa momba ny saha-pamokarana eny ambanivohitra, dia ny Fambolena, ny Fiompiana ary ny Jono ny Sekretera Jeneralin'ny Ministeran'ny Fambolena sy ny Fiompiana Ramindo Gaëtan.
