Tsy mbola lefy laza amin’ny maha sehatra goavana ihaonan’ny tantsaha mpamokatra sy ny mpanjifa, ireo teknisiana sy ny mpiara-miombon’antoka samihafa, ny Foara iraisam-pirenena ho an’ny toekarena eny ambanivohitra na ny FIER MADA. Mbola mahasarika olona maro koa na eo aza ny Tsenabe mifaninana aminy taty aoriana...
Nanomboka ny alarobia faha enin’ny volana aogositra hatramin’ny alahady 10 Aogositra izao ny andiany faha-26 amin’ny FIER MADA tanterahana eny amin’ny Kianjan’i Makis Andohatapenaka ao Antananarivo Renivohitra. 26 taona nahafahan’ireo tantsaha avy amin’ny lafy valon’ny nosy nitondra ny vokany teto an-drenivohitra, nahatarafana koa ny fivoaran’ny famokarana na amin’ny habetsahany na ny kalitao. 450 ny isan’ny trano heva tamin’ity taona ity. Mandray anjara avokoa ny sehatry ny Fambolena, ny Fiompiana, ny Jono, ny asa tanana, ny fanodinana sakafo avy amin’ny faritra 24 eto amin’ny Nosy.
Misy ny zava-baovao entina isan-taona ka misy hatrany ny fiavahan’ny andiany faha-26 amin’ny andiany teo aloha, hoy ny filoha mpanorina, Jacques RAMANANTSOA. "Apetraka eny amin’ny tsenan’ny kaominina ireo lalam-barotra ivelany sy anatiny ho fampivelarana ny famokarana eny ambanivohitra" no lohahevitry ny FIER MADA tamin’ity taona ity… Ny fikarohana lalam-barotra izay no antony voalohany iakaran’ny tantsaha sy ny mpandraharaha eny ambanivohitra eto an- drenivohitra mandray anjara amin’ny FIER MADA. Fahombiazana ny andro voalohany. Tonga maro ny mpanjifa. Manao izay ho afany mampahafantatra ny vokany sy ny mampiavaka azy ireo ny tantsaha tonga mitondra ny vokany.
