Mila hamafisina ny fampiroboroboana ny sehatry ny fiompiana any amin'ny Faritra atsimon'ny nosy hoy Andriamatoa Zafisolo Louis, mpiompy any amin'ny Faritra Androy raha tiana ny hamaha ny olana mahazo ny mponinia noho ny fisian'ny kere. Manana toerana manokana amin'izany ny fiompiana osy.

Ny fambolena araka ny fanadihadiana nataon''Andriamatoa Zafisolo Louis no namotika ny tontolo iainana tany amin'ny Faritra atsimon'ny nosy. Mafy loatra ny tsindry naterak'izay fambolena izay ka niafara tamin'ny fahasimban'ny tontolo iainana. Nanampy trotraka ihany koa ny hamafin'ny tsioka atsimo... 

Ny fiompiana osy no tena mety any amin'iny tapany atsimon'ny nosy iny. Ny fiompiana osy izay soatoavina ara-kolontsaina any amin'izany faritra izany. Manana anjara toerana lehibe amin'ny toekarena koa satria fiompiana natao hitahirizam-bola izy. Mivadika ho vola haingana ary azo atao ny manodina ny vokatra azo avy aminy, toy ny henany, ny rononony ary ny hodiny sy ny volony.

Manana anjara toerana lehibe amin'ny fampandrosoana ny eny ambanivohitra nefa ny fananana antontan'isa momba ny fiompiana hoy Andriamatoa Zafisolo Louis. Isan'ny lesoka iray eto Madagasikara ny tsy fananana antontan'isa mazava momba ny isan'ny biby fiompy. Lasa mametraka olana amin'ny fikarohana tsena any ivelany. Isan'ny iharan'izany ny fiompiana osy. Misy ny tsena any ivelany saingy tsy fantatra mazava ny isan'ny osy eto Madagasikara ka olana amin'ny famaliana ny komandin'ny mpanafatra izany.