Niantso ny Kardinaly Odilo SCHERER, arsevekan’i SAO PAULO any Brésil i Papa François, nanehoany ny ahiahiny manoloana ny firongatry ny fifindràn’ny tsimokaretina coronavirus sy ny fahafatesana aterak’izany ao amin’ny arsidiosezy iadidiany.
Miombom-po amin’ny Fiangonana sy ny vahoaka breziliana ary mitondra am-bavaka azy ireo manoloana izao krizy ara-pahasalamana goavana izany ny Papa. Notsaroany manokana ireo olona sahirana miaina an-dalambe sy tsy mba manan-kialofana ary tsy afaka mampihatra na manaraka ireo fepetra samihafa hisorohana ny fihanaky ny tsimokaretina coronavirus. Efa maherin’ny iray alina ankehitriny ny isan’ireo namoy ny ainy vokatry ny covid-19 any Brésil. Maherin’ny 5 alina sy iray hetsy ireo voamarina fa mitondra ny tsimokaretina. Mandà io tarehimarika io anefa ny manampahaizana siantifika maro any an-toerana, nilaza fa mety ho 15 na 20 avo heny amin’io 5 alina sy iray hetsy io ny isan’ireo marary any Brésil hatramin’izao. Vitsy ny fitiliana vita raha oharina amin’ny isan’ny mponina izay efa mahatratra hatrany amin’ny 210 tapitrisa. Manoloana izao tarehimarika izao dia voasokajy ho firenena faha-6 maneran-tany lasibatry ny coronavirus i Brésil.
