Mampitombo ny fahalalany sy ny traikefany hanatsaràna ny seha-pamokarana ilofosany, ao amin'ny Ivon-toeram-piofanana momba ny fampandrosoana sy ny fahavitan-tena eny amin'ny tontolo ambanivohitra na ny CEDAR Ezaka Maintso, ireo tantsaha ao amin'ny kaominina Ivato sy Kaominina Talatamaty ato amin'ny distrika Ambohidratrimo.

Fiofanana nanomboka ny faha 14-ny volana marsa teo ary mandritra ny iray volana tanterahana etsy Mandrosoa, ka tantsaha 80 no mandray anjara, fiaraha-miasa amin'ny Tahiry Malagasy ho an'ny fanofanana arak'asa na ny FMFP. Fiofanana miisa telo no hatao dia ny famokarana ny zezika biolojika, ny fiompiana bitro ary ny fahaiza-mitarika, ka 20 ora avy ny fampiofanana tsirairay amin'izany, hoy Andriamatoa Andrianjafimahatradraibe Habby Arnaud teknisiana Socio-Organisateur ao amin'ny CEDAR Ezaka Maintso.

Tsy ho nofinofy ny fampitomboam-barotra manaraka ny fenitra ara-pahasalamana raha samy mampihatra ny fambolena nohatsaraina ara-biolojia avokoa ny mpamokatra. Naharesy lahatra an'ireo tantsaha mandray anjara ny fampiofanana karakarain'ny CEDAR Ezaka Maintso, etsy Fitroafana-Mandrosoa. Zava-baovao eo amin'ny seha-pamokarana no atolotra, mbola tsy hita sy nampiharin'izy ireo tamin'ny sehatry ny fambolena sy ny fiompiana.

Zava-dehibe ho an'ny Kaominina Talatamaty ny fampiofanana ny tantsaha ao aminy mba hisian'ny fampivoarana ny tontolo ambanivohitra hoy Andriamatoa Randrianarivony Solo Bruno Marie, lefitra voalohan'ny Ben'ny Tanàna.