Mila hamafisina ny fanohanana ny Faritra Atsimo-Atsinanana amin'ny ady atao amin'ny tsifanjarian-tsakafo. Nahazo vahana mantsy ny tsifanjarian-tsakafo mitarazoka sy ny mahery vaika taorian'ny fandalovan'ny rivo-doza Batsiray sy ny Emnati hoy ny governoran'ny Faritra Dokotera Mahafaky Justin. Nahatratra 48,5% ny tahan'ny tsifanjarian-tsakafo mitarazoka ho an'ny zaza latsaky ny 5 taona talohan'ny fandalovan'ny rivo-doza. Niakatra manodidina ny 50% izany taorian'ny fandalovan'ny rivo-doza araka ny fanazavany...

Miadana nefa ny fanapahana ny rohy mahatonga ny tsifanjarian-tsakafo mitarazoka ka mila ampiana ny fanohanana ny Faritra handresy azy io hoy  ny governoran'ny Faritra Atsimo-Atsinanana Dokotera Mahafaky Justin.

Amin'ny fotoanan'ny maitso ahitra no tena itrangan'ny tsifanjarian-tsakafo mitarazoka indrindra ny tsifanjarian-tsakafo mahery vaika any amin'iny Faritra Atsimo-Atsinanana iny. Mila hamafisina ny fampiannarana ny olona any ambanivohitra amin'ny fikarakarana sakafo hoy ny governora Dokotera Mahafaky Justin.

Manatanteraka ny Politikam-pirenena ho an'ny Fanjarian-tsakafo na ny PNN any amin'ny Faritra Atsimo-Atsinanana ny Ôfisim-pirenena ho an'ny Fanjarian-tsakafo na ny ONN amin'ny alalan'ny Ôfisim-paritra ho an'ny fanjarian-tsakafo na ny ORN. Toa izany koa ny drafitr'asam-pirenena iraisan'ny departemanta samihafa ho an'ny Fanjariantsakafo na ny PNAMN.

Mandrindra marolafy amin'izay ady amin'ny tsifanjarian-tsakafo izay ny ONN. Tafiditra amin'izany ny lafiny fahasalamana, ny fanabeazana, ny famokarana sakafo amin'ny alalan'ny fambolena sy ny fiompiana ary ny jono, ny fahazoana rano fisotro madio, ny fidiovana sy ny fanadiovana ary ny fiahiana ara-tsôsialy hoy Andriamatoa Andrianjafinarivo Zonandrianina miandraikitra fandaharana ny fanjarian-tsakafo eny ifotony, ao amin'ny ORN Atsimo-Atsinanana.