Manohana an'ireo tanora hiatrika ny fampandrosoana eny ambanivohitra amin'ny alalan'ny fampiofanana sy tohana atao azy ireny ny tambazotra FARMADA, rafitra ivondronan'ireo mpampiofana amin'ny seha-pamokarana eny ambanivohitra.
Ampanantanterahana ny tetik'asa fanampiny iantsorohan'izy ireo, nampitondraina ny anarana : "Fahavononan'ny sehatra marolafy ho fanatsaràna ny tolotra ara-panofanana sy ny fampiroboroboana ny fandraharahana madinika eny ifotony".
Tetik'asa mandritra ny folo volana natokana ho an'ny tanora 200 mahery niala an-daharana tany an-tsekoly. Kendrena ho vehivavy ny 30% amin'ireo hisitraka ny tetik'asa.
Miara-dalana amin'ny fandaharan'asa ankapoben'ny fanjakàna hampandrosoana ny eny ambanivohitra sy fanofanana ho an'ny tanora hampiroborobona ny seha-pihariana eny ambanivohitra ity tetik'asan'ny FARMADA tanterahana amin'izao fotoana izao ity hoy Andriamatoa Serge Merison, filohan'ny tambazotra FARMADA eto Madagasikara.
Niaina ny voka-dratsin'ny valan'aretina Covid moa ny sehatr'asan'ny FARMADA saingy efa manomboka miverina tsikelikely indray izany hoy ny filoha nasionaly Andriamatoa Serge Merison.
