Rehefa dinihina dia tsapa fa maro ireo zavatra tsy tafita amintsika mpanabe sy ray amandreny ankehitriny. Mila fiheverana akaiky ny amin’izany, mila fandinihana lalina koa, mba hiarenan’ny fiaimpiainana sy ny fomba fiheverana ary ny fomba fisainana mety mivaona na mitsipaka tanteraka ny soatoavina ambony indrindra, dia ny fiarovana sy fiahiana ny AINA.
Ny Aina manko no iorenan’ny Fihavanana, ary ny fifampizaràna ny manta sy ny masaka no mikolokolo ny fiombonana sy ny firaisankina, sady fototry ny fandriampahalemana. " Izay iray Vatsy iray Aina ", koa rariny sy hitsiny ny mpiray Firenena sy mpiray Tanindrazana raha hifanohana sy hifanasoa ary hifamonjy sy hifanome tanana, miezaka andro aman’alina miaro ny Aina sy ny soa iombonana. Adidy arak’izany ny mikolokolo sy miaro ireo fananana iombonana: rano, jiro, renirano, lakan-drano sy kanaly, toeram-piasana, birao, sekoly, hôpitaly, làlana, fanariam-pako, toeram-pidiovana, toeram-pilalaovana, zaridaina, tsena …sns… na miankina na tsy miankina amin’ny Fanjakana izany. Natao hanampy antsika hahalala izay tokony hatao sy harahina moa ireo boky momban’ny fitaizana sy fanabeazana ny maha-olona feno sy ny olona manontolo. Ohatra: Fifampitaizan’ny mpiara-belona (Collection " Fanabeazana sy Fifampitaizana " ary efa nivoaka ny laharana voalohany, N° 1, Antananarivo 2022).
