Talata 29 marsa 2022 — Herinandro fahefatra amin'ny Karemy — Amorony fo madio aho, ry Andriamanitra; amereno ny hafaliana avy amin’ny vonjinao — Evanjely Masina nosoratan'i Masindahy Joany 5, 1-3a. 5-16

Maneho ny fomba hamonjen’Andriamanitra antsika olombelona, amin’ny alalan’ny Zanany tonga eto amin’izao tontolo izao, mba hitokiantsika sy tsy hisarahantsika Aminy ity Evanjely teo ity. Ivelan’ny valan’ondry no anombohan’ny tantara, toerana ahitana dobo fidiovana sy marary maro. Entina ilazana amintsika fa misy dingana sy fomba arahina ny firosoana ho anisan’ny ondrin’Andriamanitra. Ary tsy asan’ny tena samirery, fa iombonantsika Aminy, amin’ny alalan’ilay Mpamonjy notolony ho antsika.

Ny marary eto dia endriky ny manjo antsika olombelona, very noho ny fahotana, tsy afa-manavo-tena samirery, fa mila ny indrafon’Andriamanitra mandrakariva mba ho sitrana. Ary ilay dobo atao oe hoe "Betesda" no maneho ny famindrampon’Andriamanitra amin’ny mpanota. Diovina aloha ny marary vao miditra amin’ny valan’ondry. Toy izany koa isika, sitranina amin’ireo aretina, vao afaka hiaina ny fiainam-baovao ao amin’Andriamanitra. Tandindona ihany ny anjely manetsiketsika ny rano fa i Kristy, endriky ny indrafon’Andriamanitra no manafaka antsika amin’ny fahotana sy ny haratsiana ary ireo aretim-panahy maro mba ho anisan’ny vahoakan’Andriamanitra isika.

Mbola anatin’ny Karemy isika : fotoana fidiovana sy fanatonana ny indrafon’Andriamanitra. Meteza ho sitranina ary rahefa sitrana dia hitandrina ny tenin’i Kristy hoe : "aza manota intsony sao ratsy noho ny teo indray ny manjo anao."