Sabotsy 2 aprily 2022 — Herinandro fahefatra amin'ny Karemy — Indro ankehitriny ny fotoana tsara, indro ankehitriny ny androm-pamonjena — Evanjely Masina nosoratan'i Masindahy Joany 7, 40-53

Rentsika teo fa nampisara-tsaina sy nampisara-kevitra ny maro ny fampianarana nataon’i Kristy. Ao ireo voadonan’ny fampianarana nataony ka nino sy nahalala fa izy tokoa no Kristy, saingy natahotra ny hafa ka tsy sahy mijoro ankarihary sy milaza mazava ny maha Mesia azy. Ao ireo miandry kendritohana sy manao izay hisamborana Azy, noho ny fiheveran-tena ho manana ny marina ka tsy te hiova, na hanova fiainana mba hampizotra azy amin’ny lalana atoron’i Kristy. Na mandray an’i Kristy ho toy ny fahavalo na mpanelingelina ny safidim-po tsy hahafahana manao izay tiana atao.

Zava-nisy tany aloha izany ary mbola miseho koa ankehitriny. Hita taratra izany amin’ireo tsy sahy miditra lalina amin’ny finoana na ny fiainana maneho ny tena maha kristianina, fa menatra na matahotra ny mpaneso. Amin’ireo tonga saina saingy tsy tapa-kevitra ny hiova famindra na hanao dingana. Eo koa ireo tsy te hahalala akory ny fisian’Andriamanitra, ny misafidy ny hitoetra ao anatin’ny fahotana, toy ireo miaina ao anaty tokantrano imaso, ireo tsy te hibebaka amin’ny tsy mety iainany, ireny rehetra ireny no endriky ny fandavantsika an’Andriamanitra ankehitriny, anentanan’ny Fiangonana antsika amin’izao karemy izao mba hibebahana. Aza atao fotsy rora miteny ny Fiangonana, miantso sy manentana antsika hiainana ny toe-piainana araka an’Andriamanitra.