Alarobia 6 aprily 2022 — Herinandro fahadimy amin'ny Karemy — Toy izao no nitiavan’Andriamanitra an’izao tontolo izao: nomeny ny Zanany Tokana ka hanana ny fiainana mandrakizay izay rehetra mino Azy — Evanjely Masina nosoratan'i Masindahy Joany 8, 31-42

Mifono fahamarinana sy manafaka ary mahatonga ho olona afaka ny tenin’i Jesoa ho an’ireo izay mino Azy. Ho olona afaka amin’ny fanandevozan’ny fahotana. Eto anefa dia tsy manaiky ho hahafahana amin’ny tenin’i Jesoa ireto Jody ireto satria ho azy ireo dia ampy ho amin’ny fahafahana ny maha zanak’i Abrahama azy ireo. Tsy hain’izy ireo mantsy fa ny fahafahana tian’i Jesoa ambara dia any fialana amin’ny fahotana. Ny fanarahana ny tenin’i Jesoa tokoa mantsy no manampy hiala amin’ny fahotana ka mahatonga antsika ho olona afaka.

Ny mpanota rehetra araka izany dia andevon’ny fahotana daholo. Noho izany dia ilaina ny mpanafaka, tsy iza izany fa i Jesoa. Ary izy ihany no mitondra antsika ho any amnin’ny famonjena. Eto dia tsy nandà mihitsy i Jesoa ny amin’ny maha Zanak’i Abrahama an’ireto Jody ireto fa nahitsiny tamin’izy ireo fa tsy ampy izany raha te ho olona afaka. Mila arahina araka izany ny finoana izay nananan’i Abrahama. Ho an’i Jesoa, ny tsy finoan’izy ireo azy dia midika ho tsy fananan’izy ireo ny finoana izay tao amin’i Abrahama.

Ny finoana an’i Kristy no maha olona afaka antsika kristianina. Ary izay ihany koa no hironantsika amin’ny fahamarinana. Tompo ô, afaho izahay amin’ny fahotana sy ny fahazaran-dratsy mangeja anay. Amen.