Sabotsy 30 jolay 2022 — Herinandro fahafito ambin'ny folo mandavantaona — Ampianaro ahy, ry Tompo, ny lalànao, ary tariho ho amin’ny lala-mahitsy aho — Evanjely Masina nosoratan'i Masindahy Matio 14, 1-12

Ry kristianina havana, toherin’ny olona mandrakariva ny mpaminany satria manohintohina ny tombon-tsoa sy mamotsipotsitra ny fahotana. Tsy zakan’ny mpanota manko ny marina. I Joany Batista, ilay tsipi-panohizan’ny Testamenta Taloha sy Vaovao dia fanapahan-doha koa no niafarany. Nandrara an’i Heroda mpanjaka tsy haka ny vadin-drahalahiny izy ka nanamparan’ny mpanjaka ny fahefany. Fambara mialoha ny hiafaran’i Jesoa ny niafaran’i Joany Batista. I Jesoa no faratampony amin’ny hoe voaheloka nitory ny Fahamarinan’Andriamanitra. Isika mpianany koa dia tsy anafenana izany fa miomana amin’ny tsy fahombiazana, amin’ny tsy finoan’ny olona, amin’ny fanenjehana. Efa endrika isehoany ireny takoritsiky ny olona sy fandrabirabiana antsika ireny.

Hanatsoahantsika lesona enti-miaina mihitsy ity fanapaha-kevitr’i Heroda mpanjaka ity : aoka tsy hampanantena raha anaty hafaliana ; tahotry ny ho afa-baraka na hena-maso amin’ny olona dia mamono mahafaty olona mihitsy. Mila fehezina ny fihetseham-po.

Ny tantaran’ireo maritiry nahafoy ny rany alatsaka noho i Kristy dia manambara amintsika fa mendrika ahafoizana ny zavatra rehetra ny Fanjakan’Andriamanitra, eny fa na dia ny aina aza. Nijoro hatramin’ny farany ireo maritiry nampijoro ny Fanjakan’Andriamanitra satria izany no famonjena ny tena sy ny hafa. Tsy raraka an-tany akory fa mamokatra hatrany amin’ny fiainana mandrakizay. Amen.