Zoma 2 septambra 2022 — Herinandro faharoa amby roapolo mandavantaona — Izaho no Lalana sy Fahamarinana ary Fiainana, hoy ny Tompo, tsy misy olona mankany amin’ny Ray afa-tsy amin’ny alalako — Evanjely Masina nosoratan'i Masindahy Lioka 5, 33-39

Rentsika teo fa tsy zava-baovao teo amin’ny Jody akory ny mifady hanina sy ny mivavaka fa efa fanao. Fa i Jesoa kosa no manazava sy mampianatra antsika ny heviny sy ny ambarany ary ny kendreny. Fomba iainana ny finoana an’Andriamanitra ny mifady hanina sy mivavaka, ka tsy atao fahazarana fotsiny.

Ny fifadian-kanina dia famolahan-tena hiadiana amin’ny ratsy, hangetaheta an’Andriamanitra sy hanaiky hofenoiny. Toetry ny olona matsiaro ho lavitry ny tiana raha adika tsotra, anehoana alahelo noho ny fisarahana. Izany hoe : toetry ny mpanota mibaboka amin’ny hadisoany, mangetaheta fihavanana. Io no antony mahatonga ny mpianatr'i Kristy tsy mba mifady hanina ; miara-dalana sy miara-mitoetra amin'izy ireo mandrakariva i Kristy, ilay Mpampakatra, ka hafaliana lalandava no aterak'izany. Io iainan’ny mpianatr'i Kristy io no ilay hafaliana omena antsika mandray ny indrafon’Andriamanitra, hafaliana vokatr'ireo fahasoavana azo ary mariky ny fiainam-baovao ao amin’Andriamanitra.

Ny vavaka indray dia fitodihana tanteraka amin’Andriamanitra sy fandraisana Azy eo amin’ny fiainana manontolo. Ka tsy teny atao fotsiny, ny vavaka, fa fiainana feno an’Andriamanitra, fiainana anjakan’Andriamanitra, mikatsaka mandrakariva ny sitra-pony. Tao amin'i Kristy no tanteraka sy lavorary io atao hoe vavaka io. Ary nampianariny ny mpianany mba hiainan'izy ireo toy ny nataony. Mazava araka izany fa tsy zavatra fanao eto ivelany, toy ny fanaon’ny sasany ny vavaka nampianarin'i Kristy fa fiainana anaty, miombona tanteraka amin’Andriamanitra.

Ny iainantsika araka an’Andriamanitra ireo fomba roa ireo no fampianaran'i Kristy amin'ity Evanjely ity, fampianarana mandavorary ny fomba taloha, mba hipetraka sy hifanaraka amin’ny maha izy azy ny ataontsika eo anatrehan’Andriamanitra. Fomba vaovao maneho ny maha kristianina antsika ireny, ilana toe-po sy toe-tsaina vaovao. Enga anie izay nampianarin'i Kristy sy niainany no tanterahintsika sy iainantsika koa.