Alakamisy 16 marsa 2023 — Herinandro fahatelo amin'ny Karemy — Ario lavitra anareo ny fahadisoana rehetra nataonareo, hoy ny Tompo; ary manaova fo vaovao sy saina vaovao — Evanjely Masina nosoratan’i Masindahy Lioka (Lk. 11, 14-23)

Mandroaka demony i Jesoa, izany hoe rava ny fanjakan’ny devoly Satana fa miorina kosa ny Fanjakan’Andriamanitra. Demony moana izany hoe misakana tsy hifandray aman’olona sy tsy hiteny an’Andriamanitra. Tapaka ny fifandraisana rehetra rehefa misy demony. Soa fa eo i Jesoa mandrava ireny isan’andro amin’ny alalan’ny Eglizy sy mamerina ny maha olona amin’ny laoniny. Ny Eglizy manko dia tohin’ny asan’i Jesoa. Rantsan-tanan’Andriamanitra, hoy i Jesoa eto.

Eo anatrehan’ny asan’i Jesoa sy ny Eglizy dia samy manana ny heviny ny olona : ao ireo mankato ka miroso lalina ; ao ireo milaza hoe aleo izahay hijanona ho kristianina tsotra e ; ao ireo mangatsiaka tsy miraharaha ; ao ireo manohitra. Fitanisana ihany ireo fa roa ihany no lalana, hoy i Jesoa : na mino na tsy mino ; na miaraka na misaraka ; tsy misy marimaritra iraisana.

Ny dikan’ny hoe demony na devoly moa dia hoe “mpampisara-bazana”. Dia io fa mahazo laka tsikelikely tokoa ny fisaraham-bazana ao an-tokantrano, ao amin’ny fianakaviana sy firaha-monina, eny fa hatramin’ny Eglizy aza. Izao karemy sady Sinaody izao no fotoana handinihana izay fomba rehetra hiarahan-dia amin’ny olona rehetra no iarahana mamory amin’i Jesoa Kristy. Aoka ho sarotiny amin’ny firaisana isika satria hoy ny Katesizin’ny Fiangonana Katolika hoe : “tsy mety ho masina izay misara-bazana”. Izay mitambatra vato, izany hoe mafy, tsy rava, azo ianteherana. Vavak’i Jesoa rahateo ny hoe “mba ho iray izy rehetra”. Amen.