Sabotsy 18 marsa 2023 — Herinandro fahatelo amin'ny Karemy — Hitsangana aho ho any amin’ny raiko, ka hanao aminy hoe: “Dada ô, nanota tamin’ny lanitra sy teo anatrehanao aho.” — Evanjely Masina nosoratan’i Masindahy Lioka (Lk. 18, 9-14)

Tantara fanoharana mirakitra endri-bavaka iray ity entin’i Jesoa mampianatra antsika mivavaka. Roa lahy niakatra hivavaka tany an-Tempoly : samy resy lahatra fa mihaona amin’Andriamanitra ao ary mitombo fahamasinana, mandray ny famonjena. Zava-dehibe ny fandalovana matetika ao am-piangonana, mamangy Sakramenta Masina sy manaja ny Lakroa masina.

Tsy maintsy ovaina tanteraka ny toetra, tsy maintsy mibebaka marina rehefa hanatona an’Andriamanitra. Lasa fombafomba fotsiny ny mandeha am-piangonana raha tsy manova inona eo amin’ny fiainana ny fihaonana amin’Andriamanitra. Ny tena loza dia ny mandesoka sy manaratsy ny hafa hanatsarana ny tena, ny mihevi-tena ho zavatra, ny mizahozaho. Mila manetry tena satria izay manetry tena no hasandratra. Takonan’ny fieboeboana ny tsara rehetra vita.

Ny fanetren-tena kosa dia hatsaram-panahy lehibe ankasitrahan’Andriamanitra. Ny manetry tena tsy hoe manaratsy tena fa mametraka an’Andriamanitra sy ny namana eo amin’ny toerana mendrika azy sy mipetraka eo amin’ny toerana sahaza ny tena. Tsisy olo-marina sy mendrika fa amarinin’Andrimanitra sy vonjeny maimaimpoana daholo. Samy mila fibebahana mitohy. Ny tsirairay no tsy maintsy manapa-kevitra tsy hanadra-tena, tsy hanaratsy ny hafa fa samy hikatsaka ny sitrapon’Andriamanitra. Amen.