30 aprily 2023 — Alahady fahefatra fankalazana ny Paka — Taona A — Izaho no Mpiandry ondry tsara, hoy ny Tompo, sady mahalala ny ondriko Aho, no fantany koa — Evanjely Masina nosoratan’i Masindahy Joany (Jo. 10, 1-10)
Ry kristianina havana, ity herinandro ity no natokan’ny Eglizy hankalazantsika ny Mpiandry ondry tsara, ka saika manambara izany avokoa ny Tenin’Andriamanitra aroson’ny Fiangonana amintsika mandritra ity herinandro ity. Tsy vaovao ao an-tsofintsika, eny fa na ireo Jody tamin’ny andron’i Jesoa aza, ny teny hoe “Mpiandry ondry”, ary ambaran’i Jesoa fa Izy, ary Izy irery ihany no mpiandry ondry tsara. Ao amin’ny Eglizy dia ny Papa sy ny Eveka no mpiandry ondry, ary isika vahoakan’Andriamanitra no ondry andrasany fa mamaritra ny maha Izy azy an’i Jesoa kosa ilay hoe “Mpiandry ondry tsara”. Raha Izy àry no Mpiandry ondry tsara, dia Izy koa no vavahadin’ny ondry. Mpangalatra, hoy Izy, androany izay tsy miditra amin’ny Vavahady. Ny Testamenta Taloha manontolo mantsy dia saika rakotr’io teny io. Sarinteny entina hilazana fa Andriamanitra no miahy sy mitantana ny vahoakany. Manambara izany indrindra ny Salamo faha-22 hoe : “Iaveh no mpiandry ahy…”, sy ry Izaia ao amin’ny 40, 11 hoe : “Toy ny mpiandry ondry hiandry ny andian’ondriny izy”, sy ireo maro hafa tsy voatanisa ao. Miankina tanteraka amin’Andriamanitra tokoa ny fiainantsika manontolo ka sasa-poana isika raha sanatria hilaozany.
Ambaran’i Jesoa àry androany, fa izy no mpiandry ondry tsara ary izy irery ihany, hoy ny voalazantsika tery aloha. Ahoana moa no hilazana fa mpiandry ondry tsara i Jesoa ? Satria Izy no mpiandry tena izy sy marina, fa tsy toy ireo mpikarama araka ny voalazany izay mora mandao amin’ny sarotra sy ny sedra mety hiseho. Ny mpikarama dia miandry ny tambiny vao manao tsara ny iraka hampanaovina azy ; fa ny an’i Jesoa kosa dia voaporofon’ny asany tety an-tany izany maha mpiandry ondry tsara azy izany, dia ny tsy fitsitsiany na fiarovany ny ainy, fa foiny ho an’ny ondriny. Tsy mba nahalala sasatra izy nitady sy hamonjy ireo izay very — izany hoe ireo izay manalavitra ny fitiavan’Andriamanitra Ray sy ny lalany —, tsy nikemo na nitsoaka ady mihitsy izy nanoloana ireo fanenjehana sy fankahalana, fa vao mainka aza mijoro hatrany niaro ireo izay fantany fa azy. Fa manamafy izany maha mpiandry ondry tena izy azy izany indrindra ny hevitra fonosin’ny misterin’ny Paka, dia ny “hevitry ny fahafatesan’i Jesoa sy ny fitsanganany ho velona” izany. Ny ainy izay natolony teo amin’ny hazofijaliana no nanafahany antsika amin’ireo mpandroba rehetra, dia ny fahotana izay fototry ny fahafatesantsika sy ny forongony ; ary nampidirany antsika ao amin’ny fianakaviamben’Andriamanitra izay vala tokana irìn’Andriamanitra Ray hiriariavantsika olombelona rehetra. I Kristy no mitarika antsika ho amin’izany vala tokana izany, ary izy koa no miaro antsika. Manana ireo solontenany, mpiandry ondry ao amin’ny Eglizy isika, koa meteza isika hanaiky tarihin’izy ireo ary hivavaka ho azy ireo isika mba ho mpiandry ondry tsara toa an’i Kristy izy ireo, hahasarika antsika ondry ho tia azy. Noho ny Batemy sy ny Fankaherezana noraisintsika àry, dia irahina ihany koa isika mba ho vavolombelona mahatoky sy marina amin’izay rehetra manadrify antsika, koa alao hery, ary aza mikemo fa angataho i Jesoa izay mpiandry ondry tsara hanampy antsika. Amin’ny alalany ihany no ahafahantsika miditra ao amin’ny vala tokana, koa aoka isika tsy hitady lalan-kafa afa-tsy Izy irery ihany.
Misaotra anao izahay, ry Jesoa Mpiandry ondry tsara, fa nahafoy ny ainao ho anay ianao mba hanananay anjara amin’ny fiainana mandrakizay. Ampio izahay mba handre ny feonao mandrakariva ary tsilovy mba ho iraka mahatoky amin’ny sehatra misy anay ! Amen.
