2 jona 2023 — Zoma, Herinandro Tsotra fahavalo Mandavantaona — Taona tsy ankasa — Hamirapiratra tahaka ny fahazavana amin’izao tontolo izao ianareo, raha mitana ny tenin’ny fiainana — Evanjely Masina nosoratan’i Masindahy Marka (Mk. 11, 11-26)

Hoatran’ny hoe mandalo andro ratsy isika anio raha ny tantaran’i Evanjely no jerena, satria maheno an’i Jesoa manozona hazo tsy nety namoa atsy, ary tezitra amin’ireo mpivarotra tao an-Tempoly aroa. Tsy vitan’ny hoe andro ratsy fotsiny, fa toa mampametra-panonaniana koa aza tsindraindray, ary toa mampanontany tena hoe sao dia tsy rariny kosa raha mangataka amin’ity hazo efa hita fa tsy amin’ny fotoam-pamokarany voankazo izao ve no didian’i Jesoa hamoa, ary rehefa avy eo nozoniny rehefa tsy nanome voa tamin’io fotoana nandalovany teo io ka maina sy maty niaraka tamin’izay.

Zavatra manaitra amin’ity tantara dia ny hanoanan’i Jesoa, ary maniry Izy ny hivoky amin’io hazo io. Mila antsika Andriamanitra, noana antsika Izy. Mila vonona mandrakariva hanome voa isika manoloana ny hanoanan’Andriamanitra. Azo heverina ny fitiavana ny voa eto, azo heverina ny fanantenana ihany koa sy ny finoana satria efa nasainy, noevohiny sy nokarakarainy isika ; ka moa vonona ny hanome Azy vokatra amin’izay fotoana itadiavany an’izany ?

Manasa antsika hanana toe-tsain’ny mpivavaka marina kosa ilay tantara hafaroa mahakasika ny fandroahana ireo mpivarotra tao an-Tempoly. Indraindray mantsy isika rehefa mivavaka hoatran’ny olona ho any an-tsena : ny fitafiana, mandeha amin’ora izay metimety amintsika. Indraindray ihany koa manana toe-tsain’olona miantsena : hiresaka amin’ny hafa, hiady varotra. Ireo toe-tsaina sy toe-panahy ireo no tian’i Jesoa horoahina ao anatintsika rehefa hivavaka, satria hihaona amin’Andriamanitra no anton-diantsika fa tsy hihaona amin’ny mpivarotra any an-tsena akory.