Talata 03 marsa 2020 — Herinandro voalohany amin'ny Karemy — Evanjely Masina nosoratan'i Masindahy Matio 6, 7-15 — Tsy ny mofo ihany no iveloman'ny olona, fa ny teny rehetra aloaky ny vavan'Andriamanitra.
Ry Kristianina havava! Miezaka mitsinjo ny farany mandrakariva isika mba tsy ho ratsy fiafara; mba tsy ho toy ireo osy voaozona eo ankavia araka ny hafatra nomena antsika omaly. Mitady antsika hatraiza Andriamanitra. Tsy foiny ho very mantsy isika, fa iriny mba hiara-monina aminy amin-kasambarana. Ho fanomanana antsika amin’izany dia niara-niaina tamintsika i Jesoa ary tsy izany ihany fa nampianatra antsika koa, mba hizorantsika amin’ny fahamarinana sy mba hahalalantsika ny Ray. Ny vavaka no isan’ny manampy antsika amin’izany ka ampianarin’i Jesoa antsika ary ny tokony hataontsika, ny toe-po amam-panahy tokony hananantsika rehefa mivavaka isika. Hoy Izy: "Raha mivavaka ianareo dia aza mba maro teny tahaka ny jentily, fa hataony ho ny hamaroan’ny teniny no hihainoana azy". Ny vavaka takian’Andriamanitra amintsika dia izay vokatry ny fontsika, ary atao am-panetren-tena.
Tsarovy fa efa fantatr’Andriamanitra ny ilaintsika na tsy mbola mangataka Aminy aza isika. Mampianatra antsika ny endri-bavaka tokony ataontsika àry i Jesoa, dia ny vavaka izay efa diso haintsika loatra dia ny "Rainay" ary indraindray aza dia toa tsy tsapantsika loatra ny maha vavaka feno an’io vavaka io. Tena inoantsika ary tsapantsika tokoa ve, rehefa mivavaka isika fa "Raintsika" Andriamanitra ary mahalala izay mahasoa antsika Izy?
Tsy ampy anefa ny mivavaka sy mino fa tsy maintsy miatrika asa isika satria maty ny finoana raha tsy arahina asa. Isan’ny asa takiana amintsika ny mitia ny mpiara-belona amintsika, ny fanampiana ny mahantra, fa indrindra ny fifamelana sy ny maro hafa koa. Isan’ny asian'i Jesoa tsindrim-peo ny famelana amin’ny fampianarany antsika androany. Mandeha ila mantsy ny vavaka ataontsika raha tsy miezaka manahatahaka ny Ray isika mikasika ny fitiavana sy ny famelana, ary amin’izany ny endrika hisehoan’ny fanjakan’Andriamanitra dieny ety an-tany. Mba mahaiza mamela amin’ny fo tokoa ary amim-pitiavana ny namana na ny olona diso taminao na nanafintohana anao. Hiezaka àry isika hanana ireo toetra tsara ireo mba ho lavorary kokoa ny fifandraisantsika amin’ny Ray. Ary aoka isika tsy hila dera amin’ny mpiara-monina raha mivavaka na manao ireny asa soa ireny, fa lehibe lavitra noho ny dera sy ny voninahitra aty an-tany ny valisoa ho azontsika amin’ny Ray.
Ry Tompo Andriamanitra Rainay ô! Ianao mahalala ny ao am-po tsy miloaka, ka ny herinao anie hanampy anay ho tsotra raha mivavaka ary izany fahatsorana izany anie no hanampy anay hitia ny mpiara-belona aminay ary hiala amin’ny fihatsaram-belatsihy. Amen!
