21 nôvambra 2023 — Talata, Herinandro Tsotra fahatelo amby telopolo Mandavantaona — Ny teninao, ry Tompo, no fahamarinana. Ankamasino amin’ny fahamarinana izahay — Evanjely Masina nosoratan’i Masindahy Lioka (Lk. 19, 1-10)

Mampianantra antsika hitady an’i Jesoa ny fihetsika asehon’i Zake, lehiben’ny mpamory hetra eto. Mpanan-karena izy, fa nahagaga fa mbola misy zavatra tsy ampy aminy, toa manintona azy fatratra ny te hahafantatra misimisy kokoa an’i Jesoa. Azo heverina fa na dia nanan-karena aza izy, toa tsy nahasakana azy ny tsy hihaona amin’i Jesoa izany harena nananany izany. Natosiky ny faniriana izy ka tsy nahalala henatra sy vavam-bahoaka ka dia nianika hazo hahafahany hitazana an’i Jesoa.

Tsy nampoiziny ny zava-nitranga, fa i Jesoa ilay niriny ho hita no indro mampanasa azy ho ao an-tranony. Tsy niandry fotoana akory i Zake fa avy hatrany dia nanaiky ny handray an’i Jesoa ao an-tranony sy naneho hafaliana lehibe tokoa, toa zazakely nahazo fanomezana efa nampoiziny hatry ny ela.

Nanova ny fiainan’i Zake ny fidiran’i Jesoa tao an-tranony, koa nasehony tamin’ny alalan’ny fizarana ny an-tsasa-pananany ho an’ireo mahantra izany, izany hoe nasehony tamin’ny alalan’ny fahafoizana ny vola aman-kareny satria nahatsapa nahita raki-tsoa sarobidy izy. Toa nampianatra azy hikatsaka ny rariny sy ny hitsiny ny fidiran’i Jesoa tao an-tranony. Asaina haka tahaka an’i Jesoa isika rehetra izay tsy sasatra ny manara-dia sy mandray azy isan’andro vaky amin’ny alalan’ny Teniny sy Vatany.