23 nôvambra 2023 — Alakamisy, Herinandro Tsotra fahatelo amby telopolo Mandavantaona — Andriamanitra no nampihavana an’izao tontolo izao indray tamin’ny alalan’i Kristy sy nametraka indray ny teny fampanantenana tamintsika — Evanjely Masina nosoratan’i Masindahy Lioka (Lk. 19, 41-44)

Mampitomany an’Andriamanitra sa mamalifaly Azy ny fihetsika sy fiteny ataontsika ankehitriny? I Jesoa mitomany ny amin’ny Jerosalema no lazain’ny Evanjely anio. I Jesoa malahelo satria tia. Mety mbola hitomany hatrany Izy ankehitriny raha toa ka tsy mahatsapa ny fitiavany antsika isika. Tia antsika mantsy Izy matoa mitomany toy izany ary mbola vonona ny hananatra sy hanitsy amin’ny tsy mety ataontsika Izy ao ambadik’izao ranomasony izao; tia antsika Izy matoa misahirana andro aman’alina mitady antsika very hiverina ao am-bala tokana. Fa mampitomany Azy kosa ny fanànana fo vato manoloana ny fampianarana sy fanentanana ataony hiovantsika; hibebahantsika; mampitomany Azy fatratra ny fandavantsika handray Azy, ilay Mpitondra fiadanana eto an-tany. Azo heverina fa ireo be marenina sy manana fo vato ary ireo minia ho jamba no mampitomany Azy hatramin’izao.

Mahay mamalifaly Azy kosa anefa isika rehefa mahatsikaritra ny fitiavany sy ny tenin’ny fiadanana entiny; mahay mamalifaly Azy isika rehefa mahay mandray Azy ao am-po ka vonona ny hiaina an’izany; mahay mamalifaly Azy isika raha toa ka manokatra ny sofintsika hihaino sy hanatanteraka eo amin’ny fiainana izay lazainy.

Mila ny fanetren-tenantsika izany; mila ny fisokafana amin’ny fahasoavan’Andriamanitra indrindra indrindra, satria izany no ahafahana maheno sy mahatsapa ny fitiavany antsika sy ny famonjena ho antsika, koa angataho àry Izy Tompo, hanampy sy hamolavola antsika.