4 desambra 2023 — Alatsinainy, Herinandro voalohany amin'ny Fiavian'ny Tompo — Ny Tompo no mpitsara antsika, ny Tompo no Mpanjakantsika. Izy no hamonjy antsika — Evanjely Masina nosoratan'i Masindahy Matio 8, 5-11

Ity Evanjely ity no maneho miharihary fa ny olombelona rehetra no nanirahan’Andriamanitra ny Zanany mba hahazo ny famonjena, eny fa na dia ireo tsy mbola nahalala Azy aza, dia tarihany ho ao Aminy amin’ny alalan’ity Zanany, nanaiky ho tonga nofo, izay hiomanantsika indrindra izao. Tamin’i Jesoa nandalo, dia Kapiteny, manamboninahitra romanina no nanantona Azy sy nihanta taminy mba hanasitrana ny miaramilany izay eo ambany fahefany. Tsy mba olona nino an’Andriamanitra akory, fa nahare ny lazan’i Jesoa ary natoky fa afaka hanasitrana an’ity miaramilany izay malemy, izay tsy zanany na fianakaviany akory. Ary tsy nanahirana an’i Jesoa handeha ho any an-tranony akory koa, fa natoky tanteraka ny baiko omen’i Jeosa azy, hahasitrana ny an’ilay miaramilany. “Manonona teny iray ihany dia ho sitrana ny ankizilahiko”.

Ireo dingana nasehony ireo no niderain’i Jesoa azy ho manam-pinoana, finoana hita tamin’ny teniny, ny fihetsiny sy ny famonjeny ity miaramila eo ambany fahefany. Nohamafisin’ny Papa Benoit XVI io tamin’ny katesizy nataony, hilazany ny tena finoana. Hoy izy: “Ny finoana dia maninteraka ny tena sy ny fiainana manontolo; fotoana ifandraisan’ ny olombelona sy Andriamanitra amin’ny alalan’i Kristy ny finoana, vao manjary foto-pampianarana sy fitondran-tena ary fahaiza-miaina”. Atao ahoana tokoa moa ny ilazana fa manam-pinoana ny olona iray raha toa ka tsy hita amin’ny fiainana izany, amin’ny alalan’ny vavaka ataony ohatra, ny asa fitiava-namana, ny fanetren-tena, ny fitondran-tena sy ny fahaiza-miaina. Tokony hiteraka fomba sy fiaina vaovao mandrakariva ny finoana, fa izany no tsahivintsika sy ianarantsika ao amin’ity Kapiteny, manamboninahitra roamanina ity.

Vanim-potoan’ny Fiaviana izao, vanim-potoana hiezahana mba hahateraka an’i Krsty ao anatintsika, ao am-pontsika, ka hiainantsika fiainana vaovao. Koa hamafiso ny finoantsika, havaozy ho lalim-paka, mba ho isika ankehitriny no ho kapiteny vontom-pinoana, hatoky an’Andriamanitra sy ho be fiantrana ny madinika tsy mba manan-kianteherana.

Jesoa ô, tsidiho hatrany ny fonay, mba hirehi-pitiavana Anao sy ny namanay.