11 ôktôbra 2024 — Zoma, Herinandro Tsotra fahafito amby roapolo Mandavantaona — I Jesoa Kristy Mpamonjy antsika no nanafoana ny fahafatesana sy nanambara ny fiainana tamin’ny Evanjely — Evanjely Masina nosoratan’i Masindahy Lioka (Lk. 11, 15-26)
[audo src="/images/sounds/evj-20241011.mp3" background="#0099ffff"]
Demony moana moa no noroahin'i Jesoa mialoha ny Evanjely rentsika teo. Niteraka ady hevitra maro io fanasitranana nataony io, henontsika teo ny ny vahoaka nitolagaga nahita ilay moana niteny, ny tsy tia sy ny mpanohitra, nialona sy tsy nahay nankasitraka fa hoe: endrika mampiharihary ny maha Mesia an'i Jesoa, ny fahefana ananany mandroaka Demony.
Ho an'i Jesoa, fa indrindra atorony antsika ankehitriny, dia hoe, matoa ny Demony voaroaka dia efa eo anivontsika, tonga aty amintsika ny fanjakan’Andriamanitra. Tonga niaraka Taminy ny fetran’ny ratsy sy ny asany rehetra. Ilay Mahery no indro tonga eo anivontsika. Ady atrehina isan’andro io ho antsika kristianina, mba hanadiovantsika ny fontsika, fonenan’Andriamanitra. Haharetantsika amin’ny finoana sy hahatafita antsika hatramin’ny farany.
Ny mety ho zava-misy, ambaran'i Kristy anefa dia hoe: “Mahita ny trano voadio ny Demony dia manampy hery hafa, ary miditra miverina ao indray”. Ilazana amintsika izany fa tsy indray maka eo amin’ny fiainana akory ny fibebahana, tsy ampy ny mikônfesy indray mande isan-taona, araka ny didin’ny Eglizy, ary ny fiainana kristianina tsy fakana aina na fiaretana izay midona, fa ady ara-panahy, ady hanalavitra ny ratsy. Ny fiombonantsika tanteraka sy maharitra amin'ilay Mahery, amin'ilay Andriamanitra Mahefa ny zavatra, no ananantsika filaminana, ananantsika fiarovana manoloana ny Demony sy ny asany. Io fiombonam-piainana amin’Andriamanitra io no mitondra antsika hiambina ny fanahintsika isan’andro, ary hifanampy amin’ireo manodidina antsika handresy ny ratsy.
Tsarovy àry fa ny fandroahan'i Jesoa ny Demony dia hanome antsika ny tena fiainana manoloana ireo fangejana maro manjo antsika. Izy irery ihany no tena Mpanafaka antsika amin’ny ratsy. Koa meteza hafahany mba hananantsika ny tena fahasambarana.
