Alarobia 3 febroary 2021 — Herinandro fahefatra mandavantaona — Sokafy, ry Tompo ny fonay, mba hitandremanay ny tenin-Janakao — Evanjely Masina nosoratan'i Masindahy Marka 6, 1-6

Ry kristianina havana, sabata ny andro, indro i Jesoa omban'ny mpianany nankao amin'ny sigaoga, namaky ny tenin'Andriamanitra sy nampianatra ny fanjakan'ny lanitra. Gaga ny olona tamin'ny fampianarany, fa naneso azy koa avy eo satria, olom-pantany ara-nofo i Jesoa, mpandrafitra, mpiray tanana, zaza niara-nilalao tamin'ny sasany aza, fantatra rahateo ny havany rehetra. Tsy nino an'i Jesoa izy ireo satria tsy noheveriny mihitsy, sy tsy nampoiziny ho ny Mesia io. Sahirana isika matetika rehefa mijoro amin'ny marina sy ny finoana. Tebahan'ny olona sasany ho "miseho ho inona", "tsy apahafiriny", "fantatro tsara ny momba an'iny"... Na io mandeha mivavaka alahady io fotsiny aza dia efa ahazoana resaka. Efa tratran'izany talohantsika i Jesoa, ankino aminy izay manjo antsika, tohizo ny dia. Izay hahafapo an'Andriamanitra no tadiavina fa tsy izay hahafaly ny olombelona akory.

Tsy afaka nanao fahagagana tao amin'ny tananany akory, i Jesoa, noho ny tsy finoan'ny olona. Ny finoana manko no mahatanteraka ny fahagagana, ka rehefa tsy mino, tsy mahefa na inona na inona. Raha lazaina amin'ny fomba hafa dia hoe, tsy manery Andriamanitra na te hamojy aza ; tsy maintsy mangetaheta ny olona vao afaka manao zavatra Izy. Lasa nifindra tany amin'ny tanana hafa i Jesoa no nampianatra. Tsy nijanona Izy, na dia toa tsy nahomby tao an-tananany aza. Maro ny olona hafa niandry, tsy hifanerena ny finoana, fa ny mitory no anjarantsika. Ho mafy orina hatrany anie ny finoantsika, mba hahasarika izay mbola misalasala. Amen.