2020-01-28 / 12:11:26 - Voinkava-mahatratra ka isan’ireo nitondra ny anjara birikiny ho fanampiana ireo traboina analiny vokatry ny fiakaran’ny rano sy ny tondradrano amin’ny faritra maromaro manerana ny Nosy ny kapiten’ny Barean’i Madagasikara teo aloha, Faneva Imma sy ny mpanazatra ity ekipam-pirenena malagasy amin’ny taranja baolina kitra ity, Nicolas Dupuis. Nanolotra vary 30 gony i Faneva Imma ary 20 gony kosa avy amin’i Nicolas Dupuis. Samy naterina eny amin’ny biraon’ny BNGRC avokoa ireo, omaly alatsinainy.
2020-01-28 / 11:40:29 - Handrafitra ny toetry ny andro hatramin’nyalakamisy ho avy izao ny tsio-drivotra malefaka miovaova, raha ny vina voaray avy amin’ny sampana mpamantatra ny toetry ny andro. Saika hisitraka orana hatrany, noho izany, ny eto amin’ny faritry ny afovoan-tany mahazo an’i Vatovavy-Fitovinany, Atsimo atsinanana sy ny faritra DIANA, SOFIA sy Boeny ary Betsiboka. Hahazo vahana tsikelikely kosa ny tsioka avy any atsimo atsinanana manomboka ny zoma izao. Ho maina ny andro eto amin’ny faritry ny afovoan-tany sy ny tapany atsimo ary ny ilany andrefana fa histraka orana kosa ny ilany andrefana sy ny faritra atsinanana sy avaratra. Tsy hisy aloha ny ho fiforonan’ny rivodoza amin’ity herinandro ity, raha io vinan’ny météo io.
2020-01-20 / 11:56:01 - Ho raisin’Antananarivo ny zaikaben’ny FFKM na ny Fiombonan’ny Fiangonana Kristianina eto Madagasikara amin’ity taona 2020 ity . Ho tanterahina ny 23 hatramin’ny 29 novambra izany. Andrasana aorian’izay ny hisian’ny fehin-kevitra hamaritra ny FFKM ho an’ny efa-taona ho avy sy hidirana amin’ny 40 taona vaovao. Tsiahivina fa notanterahina tany Antsiranana ny zaikabe farany tamin’ny taona 2016. Zaikabe izay tanterahina isaky ny 4 taona.
2020-01-20 / 11:54:31 - Hitantana ny Fiombonan’ny Fiangonana Kristianina eto Madagasikara na ny FFKM mandritra ity taona 2020 ity ny filohan’ny Fiangonana Loterana Malagasy, Pastora Rakotonirina David. Tontosa teny amin’ny FJKM katedraly Analakely ny tolakandron’nny alahady 19 janoary teo, ny fandraisany izany fitantanana izany avy tamin’ny filohan’ny FFKM teo aloha, ny mpitandrina Andriamahazosoa Ammi, filohan’ny FJKM. Famindram-pitantanana izay nanamarika ny fanokafana ny herinandro fiaraha-mivavaka ho amin’ny firaisan’ny fiangonana kristianina, notarihan’ireo filoham-piangonana 4 mirahalahy mandrafitra ny FFKM. Ny FFKM izay mbola ao anatin’ny fanamarihana ny faha-40 taonany amin’izao 2020 izao.
2020-01-17 / 17:01:49 - Nahazo fanomezana ahitana fitaovana ara-pahasalamana sy teknina mitentina 4,5 tapitrisa dolara avy amin’ny governemanta amerikanina ny tobim-pahasalamana any amin’ny faritra Atsinanana sy Analanjirofo. Nanolotra izany tany Toamasina, androany zoma, ny tale jeneralin’ny sampandrahaha amerikanina misahana ny fampandrosoana iraisam-pirenena na ny USAID. Lanonana notanterahina tao amin’ny biraon’ny talem-paritry ny fahasalamana any amin’ny faritra Atsinanana. Tafiditra anatin’ny tetikasa ara-pahasalamana ACCESS izay vatsian’ny USAID vola ho fanamafisana ny rafitra ara-pahasalamana eto Madagasikara ny fahazoana ireo fanomezana izao.
2020-01-17 / 16:57:52 - Hosokafana amin'ny alahady tolakandro izao ny herinandro ho an’ny fiombonam-bavaka na ny firaisam-pinoana izay ho tanterahina eny amin’ny Katedraly FJKM Analakely. Fotoana hanatanterahana ihany koa ny famindram-pitanana ny FFKM ka hanoloran’ny mpitandrina Andriamahazosoa Irako Ami ny fitantanana ny Fiombonan’ny Fiangonana Kristianina eto Madagasikara amin’ny filohan’ny Fiangonana Loterana eto Madagasikara, ny pastora Rakotonirina David izay hitondra indray ny FFKM mandritra ity taona 2020 ity
2020-01-17 / 16:54:49 - Ho ambohi-pihaonan’ny mpino avy amin’ny Fiangonan’i Jesoa Kristy eto Madagasikara na ny FJKM ny eny amin’ny kianjan’Antsonjobe, amin’ny alahady 19 janoary ho avy izao. Fotoana hitrotroana am-bavaka ny taom-piasana 2020 sy ho fitondrana am-bavaka ny filohan’ny FJKM, ny mpitandrina Andriamahazosoa Irako Ami mianakavy. Raha ny fandaharam-potoana amin’ny ankapobeny dia hifandimbiasan’ireo antoko mpihira eo anivon’ny FJKM sy ireo nasainy no hanokafana ny fotoana mialoha ny amin’ny 10 ora maraina. Harahin’ny fanompoam-pivavahana izany avy eo. Aorian’izay kosa dia hisy ny antsa an-kira mandra-pahariva ny andro.
2020-01-17 / 16:52:44 - Andrasana ato anatin’ny 3 herinandro ny fijoroan’ny vovonana handinika ny fanitsiana ny fehezan-dalàna mifehy ny harena an-kibon’ny tany eto Madagasikara. Navoitran’ny minisitra tompon’andraikitra Ravokatra Fidinarivo izany nandritra ny fihaonana tamin’ireo mpandraharaha misehatra amin’ny fitrandrahana harena an-kibon’ny tany sy ny mpamatsy vola vahiny teny Ampandrianomby, tamin'ny alakamisy 16 janoary teo. Navoitran’ireo Malagasy mpandraharaha amin’izay sehatry ny harena an-kibon’ny tany izay fa tsy miady amin’ny mpandraharaha vahiny izy ireo, saingy tsy manaiky kosa ny hibaikon’izy ireo azy.
2020-01-16 / 16:40:12 - Nankatoavina tamin’ny filankevitry ny minisitra omaly alarobia ny fifanarahana teo amin’ny banky foiben’i Madagasikara sy ny ministeran’ny harena an-kibon’ny tany sy ny loharanon-karena stratejika. Fifanarahana hametrahana ny tahirim-bolamena eo anivon’ny Banky foibe sy hamehezana ny politikan’ny vola eto Madagasikara. Isan’ny nivoitra tamin’io filankevitry ny minisitra io koa ny fanafoanana ny fanendrena ny tale miandraikitra ny “audit” sy ny “inspection”, araka ny tolo-kevitry ny minisitry ny fanajariana ny tany sy ny toeram-ponenana ary ny asa vaventy.
2020-01-16 / 15:15:33 - Hihena ny vidin-jiro any amin’ny faritr’Antsirabe aorian’ny fijoroan’ny orinasa mpamokatra angovo azo avy amin’ny masoandro. Nankatoavina nandritra ny filankevitry ny minisitra, omaly, ny famindrana ny tanin’ny ministeran’ny fampianarana ambony sy ny fikarohana siantifika, ho entina manorina sy manangana toeram-pamokarana herinaratra sahan’ny orinasa SUN FARMING any Antsirabe, ahafahana mamokatra izay herinaratra miainga amin’ny agovo azo havaoziny izay. Fantatra fa efa nanao ny fifanaraham-pivarotana tamin’ny orinasa JIRAMA ny orinasa SUN FARMING fa hivarotra ny herinaratra vokarin’izy ireo amin’ny vidiny mirary ho fampihenana ny vidin-jiro tsinjarain’ny JIRAMA.
