11 jona — Raha ny filazan’ny Asan’ny Apôstôly, i Barnabé dia Jody avy amin’ny fokon’i Lévi. Teraka tao Chypre izy io tamin’ny fotoana nanjanahana ny Jody tamin’ny vanim-potoanan’i Alexandre le Grand. Nobeazina tao amin’ny kolontsaina grika i Barnabé.

Tonga tao Jerosalema izy ary anisan’ireo kristianina tao amin’io Fiangonana voalohany araka izay voalaza ao amin’ny Asan’ny Apôstôly toko faha-4 : “nisy levita anankiray atao oe Josefa nomen’ny Apôstôly anarana hoe Barnaba, izany hoe avanana amin’ny fampaherezana. Teraka tany Sipra nana-tany izy ka namidiny dia nentiny ny vidiny sy napetrany teo an-tongotry ny Apôstôly”. Izay no voalaza ao amin’ny Asan’ny Apôstôly.

Voalaza ao amin’ireo tahirin-kevitra fa nivelona tamin’ny herim-pony i Barnabé nandritra ny asa fitoriana nataony. Fa ankohatra izay dia toa hoe nandalina ny Torah tany amin’ny sekolin’i Gamaliela i Barnabé, ary tany no nihaonany tamin’i Saoly, ilay lasa Paoly Apôstôly tany aoriana. Nirahin’ny Apôstôly nankany Antioche i Barnabé. Avy eo izy sy i Paoly namita iraka tany Chypre, nanohy an’izany tany Galasia, tonga tany Pergé, Antioche sy Pisdia, Komniome, Litra... ary avy eo dia niverina tany Antioche. Nanatrika ny kônsily tao Jerosalema ihany koa i Barnabé niaraka tamin’i Jude sy i Silas. Ary nitondra ny fanapahan-kevitra tao anatin’izany kônsily izany niverina tany Antioche. Niaraka tamin’i Jean-Marc i Barnabé avy eo ary niverina nankany Chypre. Voalaza fa maty martiry i Barnabé.