14 jona — Anarana fanta-daza ao amin’ny Baiboly ny hoe Elisée na Elisea arakaraka ny dikan-teny izay misy eo amintsika raha mamaky ny Bokin’ny Mpanjaka isika. Zanak’i Safata mpaminanin’ny lalàna, mpianatra sady mpandimby an’i Elie mpaminany.
Tamin’ny taonjato fahasivy talohan’i Jesoa Kristy i Elisée no niana, nitory teny tany amin’ny Fanjakana Avaratra izy, ary nampibaribary ny fahatokisana an’Andriamanitra tokan’i Israely, nanoloana ny fanompoan-tsampy nataon’i Baal sy Astarte izay niparitaka hatrany amin’ny Fanjakan’i Jodà ka hatramin’ny Fanjakan’i Israely. Araka ny voalaza ao amin’ny Boky voalohan’ny Mpanjaka 19, 19-21 dia hoe : “Nony niala teo i Elia, dia nahita an'i Elisea, zanak'i Safata niasa tany. Omby efatra amby roapolo tsiroaroa no teo alohany, ka teo amin'ny faharoa ambin'ny folo laharana izy. Nanatona azy i Elia sady natsipiny taminy ny lambabeny. Nilaozan'i Elisea ny ombiny, dia nihazakazaka nanaraka an'i Elia izy, nanao hoe : Aoka handeha hanoroka an'i dada sy ineny aho, dia hanaraka anao. Ary hoy Elia taminy : Mandehana miverina, fa naninona anao moa aho ? Dia niala teo aminy i Elisea, ka nalainy ny omby roa mikambana sy novonoiny, ary ny jiogan'ny omby no nandrahoany ny henany, ary nomeny hohanin'ny olona izany, vao niainga izy nanaraka an'i Elia sy nanompo azy”.
I Jesoa koa ao amin’ny fampianarany voalohany nataony tao amin’ny sinagaoga avy tao Nazareta dia nandray ohatra tamin’i Elie sy i Elisée. Nampatsiahy an’i Elie sy ilay vehivavy mpitondra tena tao Sarepta, araka ny voalazan’ny Vaovao Mahafaly nosoratan’i Masindahy Lioka 4, 25-30. Marihina moa fa hajaina ao Samaria ny fasan’i Elisée.
