22 aogositra — Ankalazaina amin’ity andro ity i Maria Mpanjakavavy. Mpanjakavavy i Masina Maria satria mitovy amin’ny zaniny izay Mpanjakan’izao tontolo izao.

Hanampy antsika handinika izany ny voalaza ao amin’ny konsily Vatikana II hoe : “I Masina Maria Virjiny tsy misy pentina, narovana tsy ho voakasika tamin’ny fahotana tamin’ny fototra, noho ny tapitra ny fiaianany teto an-tany dia nakarina vatana sy fanahy any amin’ny voninahitra any an-danitra izy”. Nasandratry ny Tompo ho mpanjakavavin’izao tontolo izao mba hitoviany kokoa amin-janany, ilay Tompo tompon’ny tompo rehetra nandresy ny fahotana sy ny fahafatesana.

Ity fankalazana ity dia nambaran’ny papa Pie XII tamin’ny taona 1954 tao aoriana kelin’ny ady taona vitsivitsy tao aorian’ny fanambarana ilay teny finoana momba ny fampiakarana an’i Masina Maria any an-danitra. Ny taona 1850 sady fanomezam-boninahitra an’i Masina Maria niseho tao Fatima. Tany am-boalohany dia ny 31 mey no natokana hanaovana io fankalazana fanajana an’i Masina Maria mpanjakavavy io fa ny papa Paoly VI no namindra azy ho amin’ny datin’ny 22 aogositra. Io papa io dia manentana sy mamporisika ny kristianina mba hanavao ny fanoloran-tena manokana amin’i Fo Madion’i Maria Renin’ny Fiangonana sy miaina izany ary maneho amin’ny fiaraha-monina ny fiainana araka ny sitrapon’Andriamanitra amin’ny fanompoana ny namana sy ny fankan-tahaka an’i Masina Maria mpanjakavavin’ny lanitra. Izany dia azontsika jerena ao amin’ny taratasy fanentanana apostolika nosoratan’i papa Paoly VI nampitondrainy ny lohateny hoe: “Signium magnum”.

Ny papa Joany Paoly II dia nangataka tamin’i Masina Maria mpanjakavavin’ny fiadanana ho an’izao tontolo izao, hoy izy nandritra ny vavaka tamin’ny Angelus ny 30 mey 1999 hoe : “Ry Maria mpanjakavavin’ny fiadanana, mpanjakan’ny olomasina rehetra, mivavaha ho anay ary omeo anay ny fiadanana ho an’izao tontolo izao”.