04 septambra — Teraka tamin’ny taona 1140 i Rosalie, tompomenakely tamin’ny fotoana nanjakan’i Guillaume I ny rainy, taranak’i Charlemegne izy io. Ho fankasitrahan’ny mpanjakavavy Marguerite, vadin’i Guillaume dia nanolotra tany tao an-tendrombohitr’i Pellegrino akaik’i Palerme izy.

Teo amin’ny fahefatra ambin’ny folo taonany i Rosalie no nisintaka nankany amin’io tendrombohitra io mba hitoka-monina, hanao fibebahana sy asa fivalozana ary hivavaka. Nitoetra tany izy mandram-pahafatiny ny 04 septambra 1170. Ambaran’ireo mpanadalina ny tantara fa anisan’ny antony nahatonga azy hifidy ny hanirery ny fandosirana ny fanambadiana izay noman-drainy ho azy ka nolaviny. Ka na tany aza izy dia nifindrafindra lava-bato matetika mba tsy hisy hahita ary voalaza fa misy anjely manoro toerana azy amin’izany fiafenana izany.

Ny taonjato fahatelo ambin’ny folo dia efa nisy nanaja an’i Masimbavy Rosalie fa nihanitombo ny fanajana azy io tamin’ny fahitana ny reliques ny 15 jolay 1634. Nentina tao amin’ny katedraly tao Palerme io reliques io, ary ny lava-bato tao amin’ny tendrombohitra kosa dia lasa ivon-toerana fanaovana fivahinianana masina ka nanorenana sanctuaire izay maro mpamangy tokoa.