Alatsinainy 4 jolay 2022 — Herinandro fahefatra ambin'ny folo mandavantaona — Ny teninao, ry Tompo dia fanahy sy fiainana. Ianao no manana ny teny mahavelona mandrakizay —Evanjely Masina nosoratan'i Masindahy Matio 9, 18-26
Miharihary eto ny vokatsoa azo avy amin'ny finoana sy ny fahatokisana an'i Kristy. Ohatra azo tsapain-tanana roa no asehon'i Masindahy Matio amintsika : Lehiben'ny sinagôga iray no manatona an'i Kristy sy nihanta taminy : "Maty vao izao... dia ho velona izy". Ny finoany sy ny fahatokisany no nanosika azy hanatona an'i Kristy, ary tsy nisalasala izy nilaza fa afaka mamelona ny zanany efa maty i Kristy. Vehivavy iray koa, nitsi-drà an-taonany maro, nanam-pinoana sy fahatokisana an'i Kristy ka sahy nilaza hoe : "Na dia ny akanjony... dia ho sitrana aho". Tsy hoe "mazia" na fanova-maso eto no ambaran'i Masindahy Matio amintsika fa ny vokatry ny herin'ny finoana sy ny fahatokisana an'i Kristy. Izay tokoa ilay hoe : "Tsy misy tsy ho hain'Andriamanitra hatao ho an'izay mino" (Lk. 1, 37). Tsy hoe ho an'i Masina Maria ihany ity teny nambaran'ny Anjely Gabriely ity, fa ho antsika tsirairary avy ihany koa, tahaka ireto olona roa volazan'ny Vaovao Mahafaly teo ireto.
Mila matoky an'i Kristy isika manoloana ny zava-manahirana antsika, ary koa mila manana finoana velona, raha toa ka mitady valiny mahafapo antsika. Koa alao hery, ary mazotoa manatona an'i Kristy, fa mamaly ny hetahetantsika mandrakariva izy, rehefa manam-pinoana isika, fa ny fioantsika ihany no hahavonjy antsika.
