Alakamisy 21 jolay 2022 — Herinandro fahenina ambin'ny folo mandavantaona — Misaotra Anao Aho, ry Ray, Tompon’ny lanitra sy ny tany, fa nambaranao tamin’ny madinika ny tsiambaratelon’ny fanjakanao — Evanjely Masina nosoratan'i Masindahy Matio 13, 10-17

Nahoana no fanoharana no hitenenanao aminy ? Ny vahoaka dia eny amoron-dranomasina no itenenan’i Jesoa. Ny mpianatra kosa dia ireo tapa-kevitra ka manatona azy, vonona ny hiakatra eo an-tsambokely miaraka aminy, vonona hiaino ny hevitra miafina ambaran’ny fanoharana, ireo no hanehoana ny tsiambaratelon’ny fanjakan’ny lanitra.

Amin’ny maha mistery ny fanjakan’Andriamanitra dia tsy natao hazava amin’ny alalan’ny fanaporofoana ara-tsiansa araka ny mahazatra antsika olombelona na koa tsy maintsy takatry ny saina sy azo tsapain-tanana izy mba mba hiekena ny fisiany sy ny fahamarinany. Fa ny fahatakarana ny fanjakan’Andriamanitra sy ny zava-miafina eo aminy dia fahasoavana vokatry ny finoana.

Enga anie isika tsy handraraka an-tany ny hasin’ireo Sakramenta sy ny Tenin’Andriamanitra ary ny fivavahana. Izay toy ny toko telo hahamasaka ny fiainana kristianina.