Zoma 13 marsa 2020 — Herinandro faharoa amin'ny Karemy — Evanjely Masina nosoratan'i Masindahy Matio 21, 33-43. 45-46 — Toy izao no nitiavan'Andriamanitra an'izao tontolo izao : nomeny ny Zanany Tokana ; ka hanana ny fiainana mandrakizay izay rehetra mino Azy.
Eo am-pampianarana ao an-Tempoly any Jerosalema i Jesoa eto no miady hevitra amin'ireo lohandohan'ny Mpisorona sy ny loholon'ny Farisianina noho izy ireo tsy nino azy. Oharin'i Jesoa amin'ny voaloboka eto ny Jody. Ohariny amin'ny mpanompo kosa ny Mpaminany ary ohariny amin'ny Zanaka dia Izy tenany ihany. Ireo mpiasa hafa dia ny jentily. Misarika ny sain'izy ireo i Jesoa eto mba hibebahany haingana, nefa vao mainka fihetsika hafa indray no hasetrin'izy ireo izany. Dia izany tokoa ny fiainan'ny olombelona ! Saro-tiavina tahaka ny hao ka izy lohalohavina indray no manaikitra. Maharitra anefa Andriamanitra, ary manao sorona ny tenany Izy mba ho fanavotana ny maro. Koa ny Zanany Lahitokana, dia Izy Kristy, ilay tiany indrindra no nirahiny ho fanatanterahana ny tarigetrany. "Ny vato narian'ny mpanao trano no efa tonga vato fehizoro".
Koa tsy ho an'ny Farisianina na ny lohandohan'ny Mpisorona ihany eto no hanomezan'i Kristy ity fanoharana ity, fa ho antsika, izay nilazana kanefa tsy mino, tsy matoky azy. Fotoanan'ny fibebahana, fotoanan'ny fiovan-dalana izao Karemy izao. Koa meteza àry mba hanaraka an'i Kristy ary hanatona azy, ilay vonjintsika sy famonjena izao tontolo izao.
