Zoma 27 marsa 2020 — Herinandro fahefatra amin'ny Karemy — Evanjely Masina nosoratan'i Masindahy Joany 7, 2. 10. 14. 25-30 — Izaho no fanangananany fiainana, hoy ny Tompo ; izay mino Ahy dia tsy ho faty mandrakizay.
Mananontanona ny fijalian'i Jesoa, herinandro vitsy rahateo sisa dia herinandro masina, handinihana ny misterin'ny fijaliana sy ny nahafatesana ary ny nitsanganan'i Jesoa, fototry ny finoantsika. Mampiady hevitra hatrany ny momba an'i Jesoa sy ny niaviany ary indrindra ny maha Andriamanitra azy. Nitoky tamin'ny hoe Mesia, mistery tsy fanta-pihaviana ny Jody ka tsy nahalala an'i Jesoa Nazareana ho Kristy Mpamonjy izy ireo. Io ilay hevitry ny Ntaolo Malagasy razantsika hoe ny marina itompoana mody heloka sy ny hoe na soloina hofany aza ny tanan'ondry dia tsy manaiky ny adala. Mifikitra loatra amin'izay voasoratra, mitana loatra ny finoan-drazana.
Manambara mazava àry eto i Jesoa, fa Izy no iraky ny Ray, tao an-tempoly mihitsy no nilazany izany. Tempoly, trano ihaonana amin'Andriamanitra. Teto izany no tokony ho fotoan-dehibe indrindra ho ninoan'ny Jody an'i Jesoa. Teto no tokony nanokafan'ny tsirairay ny fony sy ny sainy handray an'i Jesoa, kinanjo, fisamborana no nitranga. Aoka tsy handiso fanantenana an'Andriamanitra isika, aoka tsy hamadika ny fitokisan'Andriamanitra isika. Miandry, manantena antsika Izy, indrindra amin'izao Karemy izao, andao hanatona azy tokoa, fa izy manatona azy tsy mba ho menatra, ary izay mandray sy mino azy tsy hangahiahy. Amen.
