16 nôvambra 2024 — Sabotsy, Herinandro Tsotra faharoa amby telopolo Mandavantaona — Mahatoky amin’ny teniny rehetra ny Tompo; ary tsara fo amin’ny asany rehetra — Evanjely Masina nosoratan’i Masindahy Lioka (Lk. 18, 1-8)

Tsara tsipihana fa ity Evanjely androany ity dia tafiditra ao anatin’ny firesahan’i Jesoa ny hiverenany amin’ny andro fitsarana; tsy resaka vavaka ihany fa resaka finoana indrindra indrindra. Raha ianao no teo amin’ny toeran’ity vehivavy mpitondra tena ity, mety tsy ho sahy nanandrana nanatona ilay mpitsara akory ianao, satria tsy azo heverin’ny saina ny haneken’ity mpitsara izay voalaza, fa sady tsy matahotra an’Andriamanitra no tsy mena-maso olona ity.

Ny hoe vehivavy mpitondra tena dia manambara fahalemena, tsy mba misy ianteherana, tsy misy mpiaro, marefo ara-pivelomana. Ny hoe mpitsara indray dia manambara fahefana, tompon’ny teny farany, atahorana, tsy refesi-mandidy, indrindra moa fa hoe tsy matahotra an’Andriamanitra. Tsy misy hirika kely akory tokony hiantran’ity mpitsara ity an’ity mpitondra tena ity. Raha amin’ny maha olombelona izany dia tsy misy hevitra. Mahagaga anefa fa azon’ilay vehivavy izay nihitsahany. Manoloana izany koa, raha mpitsara tsy marina azo tapa-kevitra ny hanome fahafaham-po manoloana ny lemozy, ka Andriamanitra indray ve no tsy hanome rariny ny olom-pinidiny izay mitaraina aminy andro aman’alina? Ny dikan’izany dia hoe tsy azo heverin’ny saina velively hoe tsy hamaly vavaka Andriamanitra. Tena mangataka tokoa ve? Tena mivavaka ve isika?

Alaivo sary an-tsaina ny valinteny mety hahazo ity vehivavy ity, alaivo sary an-tsaina ny avonavona sy ny teny maharary mahazo azy. Rehefa tonga ny fotoana hiverenan’ny zanak’olona, moa mbola hahita finoana ety an-tany va izy? Ny vavaka dia sady hikoloana ny finoana no hikatsahana faharetana, tsy resaka tisinday io na ny tsy izany fa fifandraisana lalina amin’Andriamanitra. Ny finoana dia resaka fahatokisana sy fifikirana amin’Andriamanitra, famantarana ny sitrapony sy ny fomba hitantanany antsika.