Nanao izay ho afany tamin'ny fampandrosoana eny amin'ny tontolo ambanivohitra tany amin'ny Faritra Vakinakaratra ny Vovonana SOAMIARADIA. Vondrom-pikambanana hankalaza ny faha-20 taona nijoroana amin'ity taona 2022 ity.

Tanjona sy ny vinan'ny vovonana Soamiaradia ny hanampy ireo tantsaha mba hiroborobo eo amin'ny famokarana ny fambolena sy ny fiompiana handresena ny fahantrana. Miasa amin'ny alalan'ny vaomiera ny vovonana, dia ny vaomieran'ny fiompiana, ny vaomieran'ny fahasalamana, ny fampianarana, ny tontolo iaianana ary ny vaomieran'ny vehivavy sy ny tanora, ka amin'ny alalan'ireo no hanaovana ny asa fampandrosoana hanampiana ny tantsaha.

Azo lazaina fa andalan'ny fahatrarana ny tanjona nofaritana tany amboalohany  ny vovonana hoy ny filohany Randrianaivo Philibert amin'izao faha-20 taonany izao. Maro ny foto-drafitr'asa momba ny fampianarana no natsangana tamin'ny alalan'ny herim-pon'ny fikambanana tamin'ny faritra niasany.

Nahavita be tamin'ny sehatry ny fahasalamana ihany koa ny vovonana Soamiaradia ka maro ny tobim-pahasalamana nohatsaraina. Natolotra tamin'ny volana desambra teo ohatra ny asa vita tamin'ny fanavaozana ny CSB-II ao Manandona hoy ny filohan'ny Vovonana, Randrianaivo Philibert.

Nisedra fahasahiranana nefa ny voly vary aloha tao Manandona any amin'ny Faritra Vakinakaratra tamin'ny taona lasa iny. Nisy akony ratsy tany amin'ny voly varin'ny tantsaha mpikambana ny tsy fahampian-drano niatrehana ny fambolena hoy Andriamatoa Randrianaivo Philibert. Na eo aza ny olana amin'ny fambolena, manarina izany any amin'ny sehatry ny fiompiana ny mpikambana ao amin'ny Soamiaradia.