Nitondra fampivoarana amin'ny seha-pamokarana eny ambanivohitra ny nananganana ireo ivon-toeram-piofanana mivondrona ao amin'ny FECAMA (Fédération des Collèges Agricoles de Madagascar). Miisa dimy ireo kolejy mivondrona ao aminy, miparitaka any amin'ny faritra dimy ary samy eo ambany fiahian'ny vovonam-pikambanana FIFATA avokoa.

Mampiofana ireo tanora sy tanoran'ny tantsaha misehatra amin'ny famokarana tantanam-pianakaviana matianina. Arivo mahery ireo tanora efa voaofana ka ny 70%-n'ireo no efa voapetraka hisehatra amin'ny famokarana eny ambanivohitra avokoa. Ny taona 2003 no nijoro voalohany ny kolejy ho an'ny eny ambanivohitra, mivondrona ao amin'ny FECAMA. Ho feno 20 taona amin'ny taona ho avy, noho izany, ny nananganana ny Collège Agricole voalohany ao aminy, niorina tany Befandriana Avaratra any amin'ny Faritra Sofia sy tao Bezezika, Faritra Menabe ; nitohy tany Ambondromisotra any amin'ny Faritra Amoron'i Mania, ny ao Ambalavao Matsiatra Ambony ary ny ao Manganoro Ambatondrazaka, Faritra Alaotra.

Hanamarika izay faha-20 taona nijoroan'ny kolejy voalohany ao aminy izany ny FECAMA amin'ny taona ho avy, ary homarihana koa ny fahatratrana ny tanora arivo voaofana, hoy Andriamatoa Ando Razafindratsima, Talen'ny FECAMA. Maro amin'ireo tanora niofana tao amin'ny kolejy no raisin'ny olona any amin'ny tanana misy azy, ho toa ny mpanampy azy, mahafehy ny fambolena sy ny fiompiana, ka miantso azy ireo rehefa misy ny olana momba izany, toa ny aretim-biby, ny manindrona akoho sy ny sisa.