Tsy azo tsinontsinoavina ny anjara biriky entin'ny fampiasana fitaovana nohatsaraina mifanaraka amin'ny filan'ny tantsaha ary mifanaraka ihany koa amin'ny fivoaran'ny teknika misy ankehitriny. Hirika mampitombo sy manatsara ny kalitaon'ny vokatra amin'ny fambolena... Dingana sy ezaka maro anefa no nolalovan'ny Malagasy mamokatra ireny fitaovana ireny.

Maro ny Malagasy no mamokatra ireny fitaovam-pamokarana ireny ankehitriny, na tantsaha tsotra mpanao asa tanana, na orinasa efa manana rafitra ahafahana miasa amin'izany. Takatry ny fahefa-mividin'ny Malagasy tsara ny fitaovana vokarin'izy ireny manoloana ny krizy eran-tany, ka mampiakatra ny vidin'ny fitaovana avy any ivelany, nefa ho an'ny vokatra eto an-toerana, afaka miatrika tsara ny filan'ny tantsaha.

Maro ny Malagasy no misehatra amin'ny famokarana, isan'izany ny tantsaha iray mpamokatra, mpampindrana fitaovam-pamokarana ao amin'ny Kaominina Mahasolo, Faritra Bongolava. Isan'ny mamokatra milina ahafahana manetsa ihany koa ny Afafi na any Andrin'ny Fambolena sy Fiompiana ao Fianarantsoa. Tsara sedra ny milina ka maro ny tantsaha afa-po tamin'ny fampiasana azy, hoy Andriamatoa Rakotoniaina Michel, Mpiandraikitra ny tetikasa ao amin'ny orinasa.

Nifofotra, nikaroka ary namokatra fitaovam-pamokarana sy fanodinam-bokatra ihany koa Andriamatoa Andriamilato Rakotomala Isaia. Izy indray dia nanangana ny orinasany AST ety Ivato, efa ho 30 taona latsaka eo ho eo izao.

Fehiny, maro ny Malagasy no efa mirona amin'ny famokarana fitaovam-pamokarana, hanampiana ny tantsaha. Niainga tamin'ny fikarohana ny filan'ny Malagasy no nahatonga azy ireo hisehatra amin'izany.